PADAYON nga epekto ang Executive Order (EO) no. 72 ni Cebu City Mayor Edgardo Labella nga nagtugot pagsulod sa baboy ug karne sa dakbayan sa Sugbo gikan sa mga green zone nga lugar kon walay kaso sa African Swine Flu (ASF).
Kini taliwa sa resolution nga gipasar sa City Council nga nag-awhag kang Labella pag-reconsider sa iyang EO-72 ug i-ban pagbalik ang mga baboy ug karne nga gikan sa Luzon, Mindanao ug Region VIII sa Visayas.
Si Labella nibutyag nga ang iyang gihimo pinasubay sa Administrative Order (AO) gikan sa Department of Agriculture niadtong Disyembre 2019 ug ang kamanduan gikan sa Office of the President niadtong buwan sa Pebrero nga nagtugot sa pagpasulod sa mga baboy gikan sa Green Zone areas ngadto mga local government unit (LGU).
"Ang atong pag-isyu aning Executive Order pinasubay gyud sa AO sa Department of Agriculture nga giisyu niadtong Disyembre 10 ,2019 nga kadtong mga lugar declared as Dark or Green zones nag-agi ni sila og makuti nga requirements, documentation unya gi-confirm sa atong pinalanggang Presidente Duterte sa iyang AO nga giisyu niadtong February 2020," padayag ni Labella.
Ang mayor nibutyag nga igo lang siya nga nagsunod sa mando sa MalacaƱang.
"Kon dili ni nato sundon sama ra nga nisupak ta sa order sa DA ug sa order sa Presidente. Ato lang gud sundon kon unsay mga lagda because the AO is very categorical and the order of the President is very clear nga gitagaan og instruction ang local government to comply with the directive and we cannot go beyond," dugang sa mayor.
Ang City Council niadtong Mayo 4, niaprobar sa resolution ni Konsehal Raymond Garcia nga nag-hangyo kang Labella nga i-ban ang mga baboy ug iyang produkto nga gikan gawas sa Visayas lakip usab ang Region VIII sanglit delikado nga masudlan og ASF ang Sugbo.
Apan si Labella nagkanayon nga base sa iyang EO, kadto rang mga lugar nga gi-cleared sa DA ang mahimong makasulod sa Cebu City basta aduna silay igo nga mga dokumento nga gipangayo sa gobyerno. (PAC)