Nagmaoy gipusil, patay

PATAY ang usa ka 41-anyos nga nagmaoy human kini pusila sa kapuyo ra usab sa iyang gidunggab niadtong Lunes sa gabii, Mayo 4, 2020 sa sityo Living Water, barangay Basak-Pardo, dakbayan sa Sugbo.

Si PCpl.Jeymus Tordios sa Pardo Police Station sa pagpakighinabi sa Superbalita Cebu miila sa namatay nga si Christopher Albo alyas Abay nga molupyo ra usab sa maong dapit samtang ang suspetsado nga silingan ra usab sa biktima mao ang usa ka Victor Alegado.

Matod pa nga si Aldo, sa wala pa mahitabo, mibisita kini sa iyang manghod nga si Monaliza alang sa usa ka salu-salo isip selebrasyon sa adlawng natawhan sa anak nga babaye niini.

Apan taliwala sa selebrasyon, kalit nga mibiya si Aldo human kini magkalalis sa iyang igsuon ug didto kini padulong sa panimalay ni Alegado kinsa giingon nga iya ra usab nga higala.

Sa imbestigasyon sa kapulisan, nasuta nga si Aldo nakaagi og mga istambay nga nagtato ug gitanyagan kini kon gusto bang magpatato.

Apan matod pa igo ra kining midiwalwal sa iyang dila nga nakapainit usab niadtong nagtato. Matod pa nga kon wala mauwang sila sa mga nagpalibot kanila niadtong higayona, hayan magkasumbagay gyud ang duha.

Tuod man nahiuli si Aldo sa ilang panimalay apan sa wala damha, mibalik kini nga may dala na nga sundang ug didto nanghagis.

Dinhi ning higayona, iyang natigbasan si Janeth Mipieza, 41, kapuyo ni Alegado, ug nadunggaban usab ang uyab sa ilang anak nga si Alfred John Alesna, 17.

Sa pagkahibawo ni Alegado sa maong hitabo, dali kining mikuha sa iyang pistola ug mipusil sa makadaghang higayon ni Aldo hinungdan sa kamatayon sa nauwahi.

"Amigo raman gyud daw ni si Albo ug Alegado mao to nga kalit ra kaayo ang panghitabo," matod ni Tordios.

Patay si Albo diha-diha dayon samtang dali usab nga misibat si Alegado nga dala ang armas.

"Upat daw ka buto ang ilang nadunggan," ni Tordios.

Si Gina Rabaya, kapuyo sa namatay, wa magdahom sa hitabo.

Dugang pa ni Gina nga iya man unta nga badlungon si Albo sa wala pa ang pang hitabo tungod sa nakita niini ang dala nga sundang. Apan tungod sa gibating kahadlok wala na siya kapugong niini.

Ang hepe sa Pardo Police Station PMaj.John Kareen Escober miawhag sa suspek nga mas maayo pa nga motahan nalang sa iyang kaugalingon aron mas moubos-ubos pa ang iyang silot niini. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph