DUL-AN 300 ka mga tawo sa probinsya sa Sugbo nga nadakpan sa kapulisan nga nagsugal atol sa gipatuman nga enhanced community quarantine (ECQ) irekomendar sa Cebu Provincial Police Office ngadto sa mga local nga kagamhanan nga dili mahatagan og hinabang gikan sa gobyerno.
Matod ni Police Colonel Roderick Mariano, ang hepe sa Cebu Provincial Police Office (Cppo) nga bisan hugot na ang pagdili sa mga tawo nga manggawas atol sa ECQ aduna pa gihapoy magsugal.
Tungod niini iyang gimandoan ang mga chief of police sa paglista sa pangalan sa mga nangadakpan ug isumiter ngadto sa mayor sa kalungsuran aron dili na mahatagan sa hinabang gikan sa Department of Social Welfare and Development (Dswd) nga mao usab ang mando ni President Rodrigo Duterte.
“Siguro di na sila makakatanggap dahil nakakulong sila but we will get the list duon sa ano we will advise yung ating mga chief of police to submit the names ng mga nahuli sa mga sugal sa kanilang respective LGU para ma-cancel yung kanilang mga tulong ng gobiyerno,” matod ni Mariano.
Sulod sa usa ka buwan nga ECQ nakasakmit ang kapulisan sa tibuok probinsya sa Sugbo og P70.1 million nga balor sa illegal nga drugas sa 176 ka anti drug operations diin 173 ka mga drug pushers ang nadakpan ug 57 ang mga users.
Ang labing dako niini mao ang mga naibot nga punoan sa marijuana nga moabot sa 236 kilos ug sais kilos sa gituohang shabu.
Lakip sa gipahibawo ni Mariano mao ang pagtibugsok ngadto sa 54 porsiyento sa crime volume sa tibuok probinsya kini tungod sa hugot nga pagpatuman sa ECQ.
“Yes napakalaking tulong talaga yung mag stay-at-home yung ating mga kababayan, pero sIyempre nalulungkot pa rin tayo despite na may ECQ may nahuhuli parin tayo sa gambling at sa drugs,” siya midugang.
Natala sa CPPO ang usa ka libo ka mga krimen sa kalungsuran gikan Marso 30 hangtod Abril 30 ning tuiga itandi sa 2,370 sa susamang buwan sa milabayng tuig. (AYB)