GIANUNSIYO na sa Department of Education (DepEd) nga Agusto 24 magsugod ang klase sa pampublikong mga tunghaan, apan posible nga di classroom setting taliwa sa hulga sa coronaviruse disease (Covid-19).
Samtang giawhag usab ang mga pribado nga tunghaan nga mosunod usab sa maong petsa sa pagbukas sa klase.
Si DepEd Secretary Leonor Briones nianunsiyo Martes, Mayo 5, nga Agusto magsugod ang klase sa pampubliko nga mga tunghaan.
Apan ang pagklase magdepende sa sitwasyon sa matag lugar kon unsang pamaagi ang pagklase.
Matod ni DepEd 7 Regional director Salustiano Jimenez nga gihan-ay na nila ang learning continuity plan alang sa pagpatuman sa mga pamaagi nga gamiton sa pagtudlo.
Dugang ni Jimenez nga gisugdan na nila ang survey sa mga principal sa nagkadaiyang mga tunghaan sa Central Visayas kon unsa nga pamaagi sa pagklase ang gamiton nga mahaom sa sitwasyon.
Gawas sa online o virtual class nga ipaagi sa internet, mamahimo usab nga ipatuman ang blended learning.
Sa blended learning, kausa ra sa usa ka semana mosulod sa tunghaan ang tinun-an apan hatagan og assignment nga buhaton alang sa nahabilin nga mga adlaw sa semana.
Mga Titser Mo-report
Sugod Hunyo 1, kinahanglan na usab nga mo-report ang mga magtutudlo tungod kay sa Abril ug Mayo lang ang proportional vacation pay.
Tungod kay nakahimo na sila sa early enrollment sa Enero ug Pebrero alang sa kindergarten, grades 1, 7 ug 11 o senior high, automatic nga i-promote ang tinun-an sa sunod nga grade level kana kon way hagbong ang tinun-an.
Posible nga moabli ang ilang laing batch sa enrollment karong Hunyo, apan wa pa mahibaw-i kon unsa ang pamaagi.
Gipaniguro usab ni Jimenez nga ang tanang mga tunghaan nga gihimong Barangay Isolation Center ipaubos sa disinfection ug fumigation aron masiguro nga di magpabilin ang kagaw sa giistaran nga mga classroom sa mga pasyente sa Covid-19.
Uyon
Alang kang Lapu-Lapu City Mayor Junard Chan nga haom ang Agusto 24 alang sa pagbukas sa tingklase.
Sumala pa niya nga sud ning buwana, gisugdan ang sub-sub nga strategic rapid testing sa kapin sa 12,000 ka mga residente sa dakbayan.
Samtang sa Hunyo igo nga ma-ayo ang mga niguwa nga positibo sa Covid-19.
“Igo nga makompleto ta sa atong Covid test by May, then maayo sila by June. Kanang August 24 sa opening sa klase, okay ra nang petsaha,” pamahayag ni Chan. (HBL, FVQ)