MAAYONG adlaw na sab sa tanan, mga katawhan nga nag-antos aron matuman ang sugo sa gobyerno bisan sa kalisud nga atong gi-agian karon.
Niadtong Mayo 1, walay natigayong rally alang sa Labor Day, diin gisaulog sa katawhan ang adlaw sa mga mamumuo sud sa ilang mga balay samtang nag-quarantine ug padayong nag-lockdown ang Davao Region tungod sa coronavirus disease 2019 (Covid-19).
Ang gidugayon sa atong pag-lockdown sa atong mga balay magdala unta og leksyon sa matag usa kanato, nga dili diay permanente ang panahon, apan ang tanan dunay iyang katugbang. Luyo sa atong kalipay, naa ang kasakit. Katugbang sa kaharohay ang kalisud mao nga unta matag usa dili na magpatuyang nga hutdon kung unsa ang naa karon kay duna pay ugma nga moabot.
Dihang mibutho ang isyu sa Covid-19, daghang mga empleyado sa gobyerno ug sa mga pribado nga hospital ang mibiya sa ilang gipanumpaan nga propesyon kay nahadlok sa risgo nga ilang atubangon.
Naniguro silang daan sa ilang kaugalingon, timailhan nga ang ilang pag-serbisyo naga depende lang sa maayo nga panahon. Kung sa Bibliya pa, sila ang ginaingon nga binayran nga mga magbalantay sa karnero nga mobiya sa panon kung aduna nay lobo.
Ubay-ubay na ang ihap sa mga doktor, nurse, pulis, sundalo ug uban pa nga nalakip sa mga frontliners ang mibuhis sa ilang kinabuhi. Ato silang ginayukboan sa pag-una sa panginahanglan ug kinabuhi sa uban samtang gisakripisyo ang kamingaw sa ilang kaugalingon nga pamilya nag-serbisyo nga walay kasigurohan nga basin mahimong hinungdan sa ilang kamatayon sa umaabot nga mga adlaw ug hingpit nga mobiya ning kalibutan.
Kung sa ako lang, ang mga mibiya sa ilang trabaho aron maniguro sa ilang kaugalingon, dili angayan ibalik pa sa katungdanan, samtang daghan ang gusto manarbaho apan napugos pag-abroad tungod walay bakante nga kasudlan.
Karon, nangitag kinse mil ka mga trabahante ang gobyerno nga paserbisyuhon sulod lang sa tulo ka bulan. Kung ang manarbaho naga-atubang og risgo apan mosugal sa ilang kinabuhi, mas angayan pa sila nga ipabilin nga mo-serbisyo ug unta makita ang ilang kaisog sa ngalan sa pagserbisyo sa katawhan.
Mahatagan unta sila og mas taas nga panahon nga moserbisyo sa nasud nga alang sa ilang isig ka Filipino kay sila angayan sab ilhon sa ilang pagpaka bayani karon.