DIGOS CITY -- Gibutyag sa mayor ning dakbayan nga planong magpatuman og 15-day border lockdown human adunay nag-positibo sa coronavirus disease (Covid-19) sa Malita, Davao Occidental.
Sumala ni Mayor Josef Cagas nga mohimo pa sila og suwat sa Department of the Interior and Local Government (DILG) kung matugtan nga ipailawom pagbalik sa enhanced community quarantine (ECQ) ang siyudad human nakita niini nga nag-anam kadaghan ang mga malapason sa general community quarantine (GCQ).
Apan nakig-alayon na sila sa kapulisan aron mahatagan og disiplina ang mga nagmagahi sa pagtuman niini.
Nabalaka sab ang mayor sanglit agianan ang siyudad sa tanang nagagikan sa nagkadaiyang dapit sanglit anaa kini sa sentrong bahin sa Davao del Sur.
Gitataw ni Cagas nga plano nilang maapil sa lockdown ang mga mosulod gikan sa Davao City aron masegurong luwas ang katawhan sa Covid-19 pandemic.
Si Cagas mitubag sab sa suhestiyon nga sugaton na lamang ang mga fish cars nga magkarga og isda sa border sa dakbayan human adunay nadakpan nga nagsuroy-suroy ang drayber nga wala naka-face mask mao nga ila na kining gitun-an.
Nasayran nga anaa na sa 65 mil ka pamilya ang nahatagan og relief goods sa lokal nga gobyerno ug anaa sa second wave ang distribusyon kon diin ang mayor mismo ang nanguna niini.
Samtang sa maong virtual presser, gipadayag sab ni Police Colonel Alberto Lupaz, police provincial director, nga ubay-ubay na ang ilang nadakpan nga mga masinupakon sa balaod.
Giangkon niini nga nakaabot na siyang buhatan ang reklamo sa mga nagpakabanang molupyo human namatikdan nga daghan nang mga tawo ang mogawas ug mga traysikel ang nagabiyahe sa Bansalan, Davao del Sur.
Apil sa mando ni Lupaz ang paghipos sa mga menor de edad nga nagsugod na pagpangpagawas sa lugar ug ang mga motorsiklo nga nagapasakay og sobra sa usa ka pasahero.
Samtang gitataw ni Lupaz nga mikunhod og dako ang mga nag-unang krimen sa probinsiya tungod sa hugot ang implementasyon sa liquor ban ug curfew hours ilawom sa Covid-19 pandemic. (Orlando B. Dinoy)