DAVAO OCCIDENTAL -- Mokabat sa kapin kun kulang 2,800 ka mga tawo sa usa ka barangay ang gipailawom sa rapid testing ug swabbing sa Malita human giingong nag-positibo ug namatay sa coronavirus disease (Covid-19) ang 65 anyos nga babaye nga gitambalanan sa Southern Philippine Medical Center sa Davao City niadtong Mayo 4 sa hapon.
Ang pasyente na-admit niadtong Mayo 1 human nagsakit, apan dangtan sa pila ka adlaw, namatay tungod sa hypertension, acute cardioembolic stroke, left middle artery ug nasuta sa test nga positibo kini sa coronavirus.
Sa pakighinabi sa Superbalita Davao sa telepono ngadto kang Prince Paraiso, Davao Occidental Health Education and promotion officer sa Provincial Health Office niadtong Martes, gisaysay niini nga way travel history ang pasyente.
Apan nagkanayon ang opisyal nga mopahigayon sila og backtracking kung kinsa ang mga nahimong bisita sa pasyente sa iyang balay.
Gipailawom na sab sa quarantine ug rapid testing ug pagkuha og swab samples sa tanang sakop sa pamilya ug kabanay sa biktima.
Dungan niini, gimando ni Governor Claude Bautista ang total lockdown sa tibuok barangay.
Sumala ni Paraiso nga mohimo sab sila og rapid testing sa mga molupyo sa tanang barangay.
Giawhag sab sa opisyal ang ilang katawhan nga di mag-panic sanglit gibuhat nila ang tanang paagi nga di mokatap ang kagaw.
Apan human sa hitabo, gipadayag ni Governor Bautista ang iyang kapungot atol sa usa ka phone patch interview sa Davao City Disaster Radio niadtong Martes sa hapon, human nag-una pagtaho si Davao del Sur Governor Douglas Cagas sa usa ka radio station sa Digos City nga aduna nay nag-positibo sa Davao Occidental.
"Natingala mi nga wala pa gani mi naka-announced sa among nahitabo diri naa nay isa ka gobernador nga gobernador nato sa laing probinsiya nga mora man ang pagtoo niya siya'y gobernador diri sa Davao Occidental. Gihangyo lang nako si Governor Cagas nga dili man ni contest kung naa ba'y Covid nga nahitabo sa probinsiya o wala. Dapat gani magtinabangay mi kung kami nga mga gobernador nga naglantaw mi para sa kaayohan sa amoang mga katawhan ug kung puwede lang di siya manghilabot diri kay mora naman nuon siya og naging spokesperson sa Davao Occidental nga siya naman nuoy nag-una-una og balita," asoy ni Bautista.
Atol sa interview ni Cagas sa radyo, gipasidan-an niini ang katawhan sa Davao del Sur nga dili moadto sa Davao Occidental ug kinahanglan nga mag-amping human adunay usa ka nag-positibo sa silingang probinsiya.