Motibo sa pagpatay sa komentarista gitumbok

MAY kalambigitan sa iyang trabaho isip brodkaster ang nag-unang motibo nga gitan-aw sa Negros Oriental Police Provincial Office (Noppo) sa pagpusil-patay sa usa ka magsisibya alas 8:30 sa Martes sa gabii, Mayo 5, Sa Barangay Daro, Sakbayan sa Dumaguete.

Si Cornelio Pepino, 48, kinsa mas naila nga Rex Cornelio, komentarista sa dyMD, gipusil-patay sa duha ka mga tawo nga nag-angkasay sa motorsiklo duol sa Villa Amada, Barangay Daro.

Iyang kauban atol sa hitabo ang iyang asawa, kinsa wa hilabti sa gunman nga nag-angkas.

Si Pepino mao ang ikatulong brodkaster sa Dumaguete nga gipusil-patay sukad niadtong 2018. Apan di pa makatumbok ang kapulisan kinsa ang mamumuno ug hain sa iyang trabaho isip brodkaster siya nakakitag kaaway.

Matod ni Police Colonel Julian Entoma, hepe sa kapulisan sa Noppo, samtang nagsakay sa iyang motorsiklo si Pepino uban sa iyang asawa, siya gipusil sa makaduha ka mga higayon sa duha ka mga tawo nga nag-angkasay.

Sa dihang natumba na ang motorsiklo, giusban pa siya sa pagpusil makatulo ka mga higayon sa gunman nga nikanaug sa motorsiklo.

Nakakuha ang mga sakop sa crime scene investigator og lima ka basiyo sa 9mm pistol nga naa na karon sa kustodiya sa PNP Crime Laboratory alang sa cross matching.

“Murag lima ang iyaha gyud nga tama kay sulti sa asawa naigo ni kaduha nga buto, nya natumba sa ground ang motor niya. Then gi-usban pa gyud nana-og ang backrider sa suspek kibale, then gitiwasan siyag tulo ka bala sa iyang lawas,”butyag ni Entoma sa Superbalita Cebu.

Kay usa ka sakop sa media ang gipusil patay, nag-umol ang Noppo og special investigation task group nga maoy motutuk sa imbestigasyon.

Kini langkuban sa Criminal Investigation and Detection Group (CIDG-7), Dumaguete City Police Station ug Noppo.

Ila usab nga duolon ang National Bureau of Investigation alang sa dungan nga imbestigasyon alang sa dinalian nga kasulbaran.

“Lisud-lisud na nuon gyud pag ila sa gunman kay nag facemask kay tanan tanan man ta naka facemask karon. Mao na nga kon maoy ma view sa CCTV murag ang ma describe ani ang size lang sa gunman dili gyud ta maka koan kaayo sa nawong unless kon naay maka identify nga naka ila gyud kaayo sa gunman,”dugang ni Entoma

Si Pepino dunay programa sa radio uban sa kapulisan matag Miyerkules.

Aktibo usab siya sa mga operation sa kapulisan sa probinsya sa Negros Oriental. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph