GIPAUBOS sa lockdown sa Cebu City Government ang tibuok Alaska sa Barangay Mambaling human sa grabeng pagsaka sa ilang kaso sa Covid-19.
Si Mayor Edgar Labella nagkanayon nga iya nang napahibawo ang kapitan sa barangay aron usab malimitahan ang pagsulod ug gawas sa mga tawo sa ilang sityo.
"Nagka-estorya nami ni Kapitan Gines Abellana and nagkasabot mi nga we have to impose a lockdown of the entire sityo Alaska. Pwerting dakoa ana. Mura na og usa ka barangay and it is a very depressed area," matod ni Labella.
Si nagkanayon nga sama sa sityo Zapatera sa Barangay Luz, ang City Hall mohatag og supply ngadto sa Alaska.
"We will provide them with support like bugas, de lata. Unya ang nakanindot lang sad daghan kaayong private firms ug individuals nga mohatag," matod ni Labella.
Ang Mambaling maoy labing daghan og kaso sa Covid-19 gikan sa kapin o kulang 30 ka mga barangay sa siyudad nga natakboyan sa coronavirus ug niangkon hapit 40 porsiyento sa kinatibuk-ang kaso sa siyudad.
Anaa na sa 433 ka kaso sa coronavirus disease (Covid-19) ang natala sa Barangay Mambaling, ug kasagaran nila nagpunsisok sa Alaska, diin sikitsikit ang mga balay.
Gawas sa Mambaling, ang laing daghan og kaso sa Covid-19 mao ang mga barangay sa Luz, Suba ig Labangon nga maoy labing daghan diin kapin 90 porsiyento kanila pulos wala nagpakita og sintomas sa maong sakit.
Ang mga pulis ubos sa liderato ni Police Colonel Josepino Ligan sa Cebu City Police Office nipahugot na sa seguridad sa Alaska aron mapugngan ang posibleng pagsibat sa ubang mga lumolupyo kinsa adunay kabalhinan gumikan sa lockdown nga gipatuman.