MOABOT lang sa 145 ka mga molupyo sa tulo ka dagkong barangay sa dakbayan sa Sugbo ang nipailawom sa rapid test batok Covid-19 atol sa unang adlaw sa strategized community testing.
Sa barangay Inayawan, 63 ra ka mga residente ang nangapil samtang 80 lang sa Barangay Basak San Nicolas.
Duna lang say 54 gikan sa Barangay Basak Pardo kansang rapid test nahuman alas 2 sa hapon. Ang mga kapitan sa tulo ka mga barangay nakasugat og samang problema.
Ilang giangkon nga diyutay ra ang nag-test gumikan sa kakuwang sa kasayuran sa ilang mga residente hinungdan nga daghang ang wala magpakuha og sample. Si Kapitan Kirk Bryan Repollo sa Barangay Inayawan, kinsa adunay 700 ka mga residente nga nalista para sa rapid test, niingon nga 9 porsyento ra ang nagpakuha.
“Inviting people to undergo the testing is challenging... I cannot say whether it is a failure or not, but I can really say nga it is challenging to convince the people,” padayag ni Repollo.
Sa iyang bahin, si Kapitan Norman Navarro sa Basak San Nicolas kinsa adunay nalista nga 800 ka mga residente, nibutyag nga 10 porsyento ra ang nakuhaan og sample. “They’re afraid, maybe because they thought swab samples will be extracted from them or on the issue of gloves,” dugang ni Navarro.
Siya nag-andam og 1,000 ka gloves kon ugaling magkuwang og gloves ang mga medical technologist.
Sa Basak Pardo, si Kapitan Catalina Cabardo niingon nga ang representante sa Mayor’s Information Liaison Office (Milo) ang niila sa mga residente nga naa sa lista.
“We don’t have control (in the event). There should have been proper coordination... proper information, but there was none,” butyag ni Cabardo.
Si Cebu City Administrator Floro Casas Jr., kinsa gitahasan ni Mayor Edgardo Labella sa pagpangu sa mass testing, niingon nga mosubay sila sa schedule sa mga barangay bisan sa kaubos pa sa turnout.
Nagtuo siya nga ang kakuwang sa impormasyon ang hinungdan nga gamay ra ang nangapil sa tests.
Human sa ilang mass testing, ilang tan-awon kon igo o kuwang ba ang gidaghanon sa mass testing.
Iyang giangkon nga di mapugos ang mga tawo nga naa sa listahan nga magpa test. Bisan si Labella niingon nga di mapugos ang tawo nga nalista kon di siya magpakuhag dugo alang sa mass rapid test.
“Of course voluntary man na. Bisan pag ni-sign sila, di sila motunga, di ta kapugos,” pasabot ni Labella sa mga tigbalita sa Miyerkules, Mayo 6, 2020.
Malampuson
Bisan kon wa pa makuha ang kinatibuk-an ug tukmang gidaghanon sa mga nagpailawom sa test, makaingon ang City Health Office (CHO) sa Dakbayan sa Lapu-Lapu nga sila malampuson. Matod ni Dr. Agnes Realiza, pangulo sa CHO, nga mayoriya sa mga lumolupyo sa 11 ka mga barangay sa mga isla nga naa sa listahan ang nagpa-test.
Wa pa makabutyag si Realiza pila ang kinatibuk-ang napaubos sa 11 ka barangay, apan giklaro niya nga kadaghanan ningsanong.
Aduna hinuoy matod pa nibalibad nga ipaubos sa testing ug wala lang usab nila pugsa.
Apan aduna usay uban nga wa unta sa lista, apan boluntaryong mipaubos sa testing hinungdan nga ilang gikuhaan.
Aduna usay wa na sa gipuy-an dihang ilang giadto sa pinuy-anan. Hapsay ra usab ang pagpaubos sa mass testing sa isla.
"Mas maasyo nga mo submit sila sa rapid mass testing kay mao man ni usa ka paagi nga mahibaw-an nato nga kting tawong mga asymptomatic nga mataptan sila sa Covid-19. Dayon mao pud ni paagi nga ang ato sitwasyon karon nga enhanced community quarantine (ECQ) pwedi tingale nga maka transition na ta to modified or general then this is also one way to flatten the curve kay ug mahibaw-an nga nagkasakit ka, ato dayong matambalan," pagpasabot ni Realiza. (GCM, JJL, PAC, REV)