ANG Free Legal Assistance Group (Flag), ang pundok sa mga human rights lawyers, namahayag atol sa World Press Freedom Day niadtong Mayo 3, nga ang mga balaod sa libel, cyberlibel ug sedition nagpabiling hulga sa kagawasan sa prensa ug mga media workers.
Matod pa sa Flag, ang usa ka gawasnon ug responsable nga prensa mahinungdanon alang sa usa ka gobyerno nga transparent, accountable ug democratic. "A free press is not an optional extra but an integral part of the liberty to enjoy all other freedoms," dugang sa Flag.
Ang Section 4, Article III (Bill of Rights), 1987 Constitution, nagkanayon, "No law shall be passed abridging the freedom of speech, of expression, or of the press, or of the right of the people peaceably to assemble and petition the government for redress of grievances."
Gigarantiyan sa Konstitusyon ang kagawasan sa libre nga pagpahayag ug prensa. Matod sa Flag, gidapigan kini sa Korte Suprema sa makadaghan ka higayon. Apan ang mga balaod sa libel, cyberlibel, sedition ug inciting to sedition ug ang Bayanihan Act nagpabiling hulga sa mga media practitioners.
Kadtong habig sa posisyon nga butangan og limitasyon ang maong kagawasan modangop gilayon sa obiter dictum ni Justice Oliver Wendell Holmes sa kaso nga US versus Schenck. Matod pa ni Holmes, "The most stringent protection of free speech would not protect a man in falsely shouting fire in a theater causing panic."
Apan wa nila ibutang nga nakaamgo si Holmes sa iyang sayop ug hingpit nga nausab ang iyang posisyon sa kaso nga Abrams versus US. Siya nagkanayon, "The ultimate good desired is better reached by free trade in ideas -that the best test of truth is the power of thought to get itself accepted in the competition of the market, and that truth is the only ground upon which their wishes safely can be carried out."
Basi niini, di kita mabalaka sa managkasungi nga ideya, hunahuna ug opjnyon. Ang mopatigbabaw mao ang kamatuoran nga dawaton sa gitawag nga free market of ideas. Bisan ang fake news ug false information dali kaayong mabuko kay ang kamatuoran man ang mopatigbabaw.
Klaro kaayo ang giingon sa Konstitusyon nga "no law shall be passed abridging the freedom of." Apan bisan pa niini gisukip gihapon ang maong mga limitasyon sa atong mga balaod. Ang labing ulahing ehemplo mao ang Republic Act No. 11469, ang Bayanihan to Heal as One Act nga nagdeklarar sa usa ka national emergency tungod sa Covid-19.
Ang Section 6(f) niini nagsilot niadtong "Individuals or groups creating, perpetrating, or spreading false information regarding the COVID-19 crisis on social media and other platforms, such information having no valid effect on the population, and are clearly geared to promote chaos, panic, anarchy, fear, or confusion."
Sama ni sa nisyagit og sunog sulod sa sinehan. - edbarrita@gmail.com