GAWAS ning hudlat sa coronavirus disease (Covid-19), mikawat usab og atensiyon sa publiko kining pagsira sa higanting television network sa nasod nga mao ang ABS-CBN Corporation.
Mayo 5, 2020, Martes mihunong ang broadcast network sa ilang operation sa dihang nakadawat kini sa “cease and desist” order nga giisyu sa National Telecomunications Commission (NTC), usa ka adlaw human mo-expire ang ilang legislative franchise.
Sa closure order, gihatagan sa NTC og 10 ka adlaw ang ABS-CBN sa paghatag sa ilang rason kon nganong dili sila angay masirhan.
Dili lalim kining nahitabo sa ABS-CBN, tungod kay nakulban usab sa kaldero ang 11,000 kapin ka mga empleyado.
Sakit pamation nga taliwala ning nagkalisod nga panahon nawad-an og trabaho ang pipila nato ka mga kaigsuonan ilabi na kadtong mga ordinaryong empleyado nga maoy gisaligan sa ilang pamilya.
Apan bisan pa man, hinaot nga dili kini maoy himuong rason aron mabalik ang operation sa ABS-CBN. Ipatugbabaw gihapon ang balaod kay posibling mahimo kining sumbanan sa ubang mga dagkong kompaniya.
Ubos sa Republic Act No. 7966, ang Kongreso maoy adunay katungod sa paghatag og legislative franchise ngadto sa usa ka broadcast network.
Niini, ang Congress nagpadala na og suwat ngadto sa NTC nga naghatag og lugway sa ABS-CBN nga temporaryong makapadayon sa ilang operation samtang ila pang gituki ang franchise niini.
Apan sa unsa bang pagka unsaa nga si Solicitor General Jose Calida mao may niporsigi ug mimando sa NTC nga pasirhan gyud ang ABS-CBN.
Sa laktod nga pagkasulti, kining nagkatuis nga interpretasyon sa Congress ug ni Calida maoy naghatag og dugang kalibog sa maong kaso.