KUMUSTA ang tanan? Ops, mora'g naghinam-hinam naman gyod ang tanan nga moabot ang Mayo 15, kay lagi mahuman na ang Enhanced Community Quarantine (ECQ), pero, ayaw kompiyansa basin unya og mo-extend na sab, labi na kung magkataas gyod ang kaso sa coronavirus disease (Covid-19) sa Davao Region, labi na sa Davao City.
Kini laging "stay at home ang peg" daghan kaayo nga mga hitabo sa atong kinabuhi ang atong mahunahunaan noh? Gani, akong mga travel goals sa miaging tuig ang milab-as sa akong panumdoman, usa niini mao ang subling pagpukaw sa akong hunahuna gikan sa dise-otso ka tuig na ang milabay uban sa akong apohan samtang sakay kami sa barko nga Super Ferry 8 gikan Davao City padung sa Metro Manila.
Kay duha ka gabii ug tulo ka adlaw ang biyahe, diha gyo'y imong mga mahimamat nga sa pagligad sa mga takna, imong masuginlan sa kaagi sa imong kinabuhi. Kini ang sagad mahitabo kung gasakay ka og barko. Pero wala nani karon sa Davao City, kay sosyal na ang peg, eroplano na, apan sa ubang lugar sa nasud, gabiyahe gihapon ang mga barko.
Nabanhaw kining tanan sa among pagsakay og barko niadtong miaging tuig uban sa akong suod nga higalang si Allyson gikan kami sa Tagbilaran City sa Bohol padung sa Larena, Siquijor Island sa Central Visayas Region.
Sakay kami sa Lite Ferries, ang barko nga padung sa Plaridel, Misamis Occidental sa Northern Mindanao, diin sa among pagsulod palang, mibanhaw na sa akong panumdoman ang akong apohan nga mipanaw na.
Sa paglingkod namo ni Allyson sa bangko diin dunay numero nga mao sab ang numero sa among ticket, natingala siya ug namulong nga mahulagway daw sa akong nawong ang paghandom sa nangagi. Giingnan nako siya sa among kagahapon ni lola, sa nag-edad pako og kinse anyos sa unang pagtaak nako sa Kaulohang Manila.
Misamot akong paghandom dihang among nakaila si Nanay Ising, 61-anyos nagdala sab siya sa iyang apo. Parihas kami og naugan didtos Larena Port. Lingaw sab nga misaysay si Nanay sa iyang kaagi, nga susama sab sa akong kaagi uban sa akong apohan niadto.
Ang tanan nga daw pagbalik sa kagahapon niadtong mga taknaa, nasanapan sa mga pahiyom dihang amoa sab nga nahimamat ang among mga katupad sa lingkuranan ug sa mga cabin deck. Usa na niini si Albert, 19-anyos, taga Plaridel, Misamis Occidental. Nagtungha siya sa usa ka koliheyo sa Mandaue City sa Sugbo.
Managhigala na kami sud lamang sa tulo ka oras nga biyahe, apan sa pagnaug namo sa Larena Port, alas 11 sa gabii, daw gibati nako ang kamingaw sa among mga nahigala sa maong biyahe. Hinuon sa among mga nahigala, nahigala sab namo sa Facebook hinungdan nga bisan sa unsang orasa mahimamat namo sila pinaagi sa social media.
Alegre karong mga panahona kay dali na lamang nato sila makontak gumikan sa teknolohiya nga maoy hinungdan nga maibanan ang atong mga kabalaka ug madugangan ang atong kasadya sa panaghigalaay.