BANSALAN, Davao del Sur -- Mokabat sa 102 ka mga tawo ang nasampolan sa unang adlaw sa gilusad sa kapolisan ning lugar nga "Oplan Sicop" (Strict Implementation on Covid-19 Policy) niadtong Miyerkules, Mayo 6.
Na-monitor sa kapolisan ang wa pagtuman sa publiko sa general community quarantine (GCQ) ug daw nakabuhi sa hawla human giwagtang ang enhanced community quarantine (ECQ) mao nga daghan ang nanggawas nga wala na magsul-ob og facemask ug sab magdala og quarantine pass.
Nag-alayon ang Bansalan Municipal Police Station, 2nd Davao del Sur Provincial Mobile Force Company (DSMFC), 1104th Company, Regional Mobile Force Battalion (RMFB)-Davao, local government unit, Municipal Health Office, Traffic Management Personnel, Municipal Disaster Risk Reduction Office sa pagpahigayon sa programa hinungdan nga nadakpan ang mga gahi og ulo ug masinupakon sa balaod.
Sayo niini, nagpaguwa og direktiba si Davao del Sur Police Provincial Office (DSPPO) Director Police Colonel Alberto Lupaz, nga mohimo og pagpanakop ang kapolisan aron mapatuman ang balaod sa GCQ.
Nakaabot sab sa buhatan ni Lupaz ang mga reklamo sa ubang molupyo sa lugar nga mituman sa "stay at home policy" human nga aduna'y daghang wa manumbaling sa mando sa gobyerno.
Samtang, gibutyag ni Major Peter Glenn Ipong nga pinaagi sa Task Force Sicop, kinahanglang madakpan ang mga tawong wa motuman sa social distancing, pagsul-ob og face mask, pagtamod sa curfew hours ug kanunay'ng pagdala sa quarantine pass kun mamalit og pagkaon ug tambal diha sa merkado.
Naobserbahan sab nga daghang mga menor de edad ug mga nag-edad 20-anyos paubos ang wa motuman sa polisiya.
Aduna sab gitakdang multa ang lokal nga gobyerno alang sa mga masikop nga wa'y facemask ug quarantine pass sa kantidad P500 sa unang higayon nga madakpan, P1,000 sa ikaduhang higayon ug P1,500 sa ikatulong ug mohimo sab og community service. (Orlando B. Dinoy)