MIPASIDAAN ang World Health Organization (WHO) ngadto sa mga kanasuran nga gikinahanglan nga mangandam sa posible sa laing hugna sa pagkuyanap sa coronavirus disease (Covid-19), samtang wa pay bakuna nga namugna sa pagsanta sa maong virus.
Gani, ang Uropa pabilin nga nagmatngon ug gipahugtan gihapon ang pagpatuman sa mga protocol batok sa Covid-19 bisan pa man nga aduna paglurang sa pagkatap sa maong sakit, pamahayag ni Dr. Hans Kluge, pangulo sa WHO Europe.
“Covid-19 is not going away any time soon,” matod pa ni Kluge, taho gikan sa independent.co.uk.
Ang University of Oxford nipahibawo nga nakig-alayon sila sa pharmaceutical company nga AstraZeneca aron sa paggama, ingon man ang pag-distribute unya sa Covid-19 vaccine nga kasamtangang anaa pa sa ‘trial stage’ sa pagtino sa ka-epektibo niini sa dili pa ipagawas sa merkado.
Ilakip sa political agenda
Nagkanayon si Dr. Kluge atol sa WHO Europe briefing sa miaging semana nga usa sa ilang namatikdan niining pagkatap sa Covid-19 sa nagkadaiyang nasud bisan kadtong aduna labing maayo nga health care system ang nakasinate sa pagkahagba gumikan sa kapaspas sa pagkalat ug ka-isog niini.
“So the biggest lesson overall at this stage would be that health really deserves to be at the top of the political agenda.
“Health is a driver of the economy — what we see now is that without health, there is no economy. Without health, there is no national security.
“Once we get out of the pandemic, through united efforts, this is a lesson never to be forgotten,” pahinumdum ni Dr. Kluge.
Inanayng mibalik
Ang United Kingdom pabilin nga gipahugtan ang lockdown apan adunay bahin sa mga kanasuran sa Uropa ang mipalu-ag sa ilang restrictions adunay pipila sa mga establisemento ang anam nga nangabli.
Samtang adunay mga residente ang anam na sab nga mibalik sa ilang naandang gimbuhaton.
Base sa talaan sa WHO nga sa labing uwahing ihap moabot ngadto sa 26,771 ka tawo ang namatay sa Covid-19 diha sa mga nagkadaiyang ospital, care homes.
Nagkanayon si Dr. Kluge importante nga sa matag nasud mangandam sa laing hugna sa outbreak.
“If the first wave is gone, [the key issue is] that we have bought the time to prepare for a second or third wave, particularly if there is no vaccine.
“The key issue is to be prepared whether it is for a second wave or another outbreak of another future infectious agent,” dason ni Dr. Kluge.
Pakig-alayon
Nipasabot ang WHO nga mamahimong malampuson ang maong tinguha sa higayon nga adunay pakig-alayon ug pagsinabtanay samtang ang tibuok kalibutan misagop sa kabag-uhan human sa gi-atubang nga krisis.
Ingon nga kahatagan og importansiya sa matag kagamahanan ang hisgutanan mahitungod sa public health.
“We’re now seeing evidence of a plateau or reduction in new cases. We must monitor this development very closely,” dugang pa ni Kluge sa dihang inanay nga ni us-os ang kaso sa Covid-19 sa Uropa.