TALIWALA sa iyang kahimtang sa panglawas, mipahiyom si Jacob Glipo, 9, kinsa nag-antos sa osteogenesis imperfecta kun ang kahumok sa kabukogan, sa dihang giduaw ni Lapu-Lapu City Mayor Junard Chan.
Ang pamilya ni Jacob usa sa gatusan sa mga residente nga grabeng naapektuhan sa dihang gipa-ubos ang siyudad sa enhanced community quarantine (ECQ) nga gisugdan niadtong hinapos sa Marso ning tuiga tungod sa pagkuyanap sa coronavirus disease (Covid-19).
Si Rachel Ragpa, 26, silingan nga taga-Sityo Soong 1, Barangay Mactan, maoy mi-post sa hulagway ug video clip ni Jacob diin makita nga naglisod sa iyang kahimtang gisamutan pa nga ang iyang pamilya naproblema sa ilang konsumo human nga ang padre de pamilya nga trabahante sa usa ka hardware store ang wa na makatrabaho tungod sa ECQ.
Niadtong Lunes, Abril 4, giduaw ni Mayor Chan ang maong pamilya aron nga katunolan sa gikinahanglan niining hinabang sama sa bugas, gatas, canned goods ug uban pa.
Naemusyonal ang opisyal nga nagsud-ong sa kahimtang ni Jacob diin bugtong niyang mahimo mao ang paghigda diha sa sawog nga gihanigan og karton, tungod sa iyang kondisyon sa panglawas nga dili makahimo sa paglingkod ug barug.
Misaad si Chan nga mobalik aron nga kahatagan og cellular phone nga maoy kalingawan ni Jacob sama sa pagduwa og online games. Sa kadtong buot motunol og hinabang ni Jacob mamahimong motawag ni Rachel Ragpa sa pakontak sa 09102923633. (FVQ)