USA ka kamandoan ang giluwatan ni Gobernador Gwendolyn Garcia labot sa protocol nga angay tumanon sa mga Children in Conflict with the Law (CICL) alang sa lalawigan sa Sugbo.
Mao kini ang gipahibalo ni Garcia atol sa press conference sa Kapitolyo niadtong sa Mayo 6.
Ang maong kamandoan gipaagi sa usa ka executive order (EO) no. 15-A nga naglatid sa protocol sa mga batan-on nga ihatod ngadto sa mga children's center sa kalungsoran.
Niadtong Miyerkules, nakigpulong si Garcia sa executive judges aron hisgutan ang maong concern.
Sa nasabutan, kinahanglan nga ipaubos sa coronavirus disease 2019 (Covid-19) testing ang mga CICL atol sa pagluwat niini.
Kon negatibo ang resulta, pahibaw-on ang local chief executive sa lungsod kon asa kini nahisakop.
Itugyan kini sa local government unit (LGU) diin ipaubos sa katorse ka adlaw nga quarantine.
"Ang mga CICL i-turn over na sad ni nato sa barangay ug ngadto na sa concerned social welfare," matod ni Garcia.
Sa maong press conference, gidayeg ni Garcia ang mga Sugboanon human nga gitaho ni Police Regional Office (PRO-7) Police Brig. Gen. Ignatius Ferro nga niubos og 70 porsyento ang crime rate sa pagpatuman sa enhanced community quarantine (ECQ).
"Makaingon ko nga dako gyud ang papel niini sa atong mga sitio, sa atong mga barangay, sa mga kaigusuonan nato nga grabi kaayo ang pagbantay," matod ni Garcia.
Nahimuot si Garcia sa mga barangay nga padayon nga mi bantay sa tagsa tagsa ka mga purok og barangay aron masiguro nga wala'y makasulod nga indibidwal nga gikan sa dakbayan sa Sugbo.
"Nakatabang ang inyong vigilance sa kriminalidad sa Sugbo. Ipadayon ta kini kay nag ECQ pa ta. Ipadayon nato ang pag bantay sa atong mga barangay og lungsod. Buot lang gyud nakong mo congratulate ninyo",matod ni Garcia. (ANV)