Dili pagdayun sa sports events suportado sa mga atleta

MGA nasyunal nga atleta sa nasud suportado ang desisyon sa Philippine Sports Commission (PSC) nga ikansela ang tanang sports activities kutob Disyembre 2020 subay sa giya sa Inter-Agency Task Force (IATF) on Emerging Infectious Diseases nga nagdili sa mass gathering taliwala sa coronavirus disease (Covid-19) pandemic, kini bisan pa man og ang enhanced community quarantine (ECQ) matangtang na.

Si PSC Chairman William "Butch" Ramirez bag-uhay lang mipaguwa og pahayag kalabot sa kanselasyon sa sports programs sa ahensiya karon nga tuig.

Si Aiba Women's World Boxing Championships 2019 gold medalist Nesthy Alcayde Petecio, diin ang amateur career nagsugod sa Davao City, nagkanayon, nga ang desisyon sa PSC chief nagpakita lang sa dakong pagtagad niya sa kahimtang ug kaayuhan sa mga atleta.

Ang 30th Southeast Asian (SEA) Games 2019 champion, nagdugang nga nasabtan hinuon niya ang sentimento sa mga atleta nga moduwa unta alang sa Palarong Pambansa ug uban pang kompetisyon.

"Pero sa karun nga sitwasyon lisod kaayo kung mag take og risk gud. Dili baya nato makita ang kalaban kung naay isa maapektuhan damay damay na tanan. Ang goals, dreams naa lang mana diha kung dili ka mag stop nga abuton na dili mana mawala kung dili ka magsuko. Pero ang kinabuhi gud isa lang na ug dili na na mabalik pa."

Suma sab ni Rio Olympics 2016 marathoner Mary Joy Tabal sa Cebu, "It's the best call even if the ECQ will be lifted this month, still it is not 100 percent safe for us athletes and for everybody to do group events."

Dugang ni Tabal nga bisan og duna any vaccine dakong hagit gihapon alang sa mga atleta ang paghunat og usab alang sa mosunod nga kompetisyon.

Samtang si World Youth and Juniors Sambo Championships 2019 bronze medalist Sydney Sy Tancontian sa Davao City, nagkanayon, "Naintindihan ko po yung decision ni chairman. He made the decision for the benefit of the athletes and everyone else."

Suportado sab ni Dabawenyo Nathaniel Sanchez, 30th SEA Games obstacle racing course gold medalist, ang desisyon ni Ramirez.

"Tingnan nalang po natin yung brighter side na naidudulot ng lockdown. I'll do the same if ako yung nasa lugar nya. Dapat di lang yung sports, lahat po."