GOOD day, ka-SUPER B! "Purya-buyag" kung sa mga katiguwangan pa ang kataas sa temperatura karong mga adlawa. Summer gayud kaayo ang panahon kay ang kainit daw mokusi na sa atong panit. Sa sobrang pagsingot sa atong kalawasan mora kita'g nag-steam bath o nag spa, kahigalaan.
Labing init pa sa kainit sa adlaw ang mga isyu sa atong palibot sama sa pagpahunong sa operasyon sa pinakadakong broadcasting network sa nasud, ang implementasyon sa Social Amelioration Program (SAP) sa atong panggamhanan ug uban pa luyo sa ginaatubang natong pandemya.
Sa pagkatinuod, dili kaayo ko suhito sa legalidad sa isyung pagpasara sa istasyon apan nasayud kita nga aduna gayud nasipyat "big time" sa maong panghitabo, igsuon. Usa kini ka isyung politika kay ang publiko (yes, kita) ang nagbutang sa mga lider nga motuki sa isyu sa hawanan sa kongreso'g senado.
Dili na kita maglalis sa social media o makig-debate sa bisan kinsa kay nasayod ang Diyos sa tanan, higala. Dili na lamang kini sa kung kinsa ang tama apan kung unsa ang gitugot sa Kalangitan nga atong agian.
"Unfair, injustice, karma, gaba ug uban" pa ang ingon sa kadaghanan apan sa gikaingon ko, naa na ni Lord BUSA maghilom kita sa makadali ug mamalandong nganong nahitabo kini.
Kahinumdom mo ni Job sa Bibliya? Wala siya nakig-away apan nagdayeg sa Ginoo luyo sa mga kalisdanan, amigo. Dili man seguro kitang tanan dunay lig-ong pagtuo ug makabaton og naghinobrang panalangin sa dihang nalampasan nato kini nga mga pagsulay apan mas labaw'ng importante karon, "BUHI" pa kita, igsuon busa mahimo pa nga makapadayon.
Kini pod hisgutanan sa SAP, nasayod na kita nga kulang gayud ang pundo nga ipang apud-apod sa matag-pamilya. Makasubo lang pamalandungon nga luyo sa pandemya, daghan gihapon ang naghinakog ug nagminaro bah!
Usa sa mga importanteng sumbanan ang record o impormasyon aron mapadangat sa tama nga tawo gikinahanglang serbisyo. Apan gi-base ang lista sa mga benepisyaryo sa 2015 nga dokumento. Intawon, paninduton seguro ang information gathering aron maapil ang mga kwalipikadong pamilya nga tinuod gayud nga nag SAP-er (suffer).
Joke gani sa uban nga ang SAP kay hinungdan sa dugang "suffering" sa katawhan kay lagi gawas sa nalista ang dili kwalipikadong benepisaryo, gilisud-lisod sa pagpalinya hangtod kaadlawon ang mga tawo.
Ang ubang lokal nga panggamhanan sa gobyerno, han-ay nga nakapaabot sa hinabang sa katawhan. Mas daghan lang ang ihap sa mga dapit diin bisan ang pagpaapud-apod sa rasyo, kuhaan pa... kun dili man ugumon, santimaan!
Hinaut nga luyo sa atong mga pag-antos karong panahona, mas mahimong maalamon kita sa tawo nga atong gipili nga moserbisyo kanato. Layo pa tuod ang eleksyon pero pangandaman na nato kini, igsuon. Hinumdomi ang "agi" ug "abilidad" sa atong mga lider karon. Ingon ani ba gihapon ang atong gustong palingkuron puhon?
Magmalahutayon ug magpadayon kita sa pag-ampo, igsuon. See you soon!