DAGHAN na ang nangalibog kung kinsa ilang tuohan og kon kinsa ang nagsulti sa sakto kay nagkamuritsing ug nagkayamukat na ang social media sa mga impormasyon nga peke lakip mga binuang mahitungod ining Covid-19, ang pinaka notorious nga sakit nga nakapausab sa dagan sa tibuok kalibutan.
Ang naka apan kay daghan na sab ang nangailad labi na kadtong mga inosente o way kabangkaagan nga mi resulta hinuon sa kadaot.
Panaglitan ang pag-inum og alcohol nga ilang pagsabot ilimnong maka-hubog nga maoy mopatay sa coronavirus 2019. Ang ending sakit sa baga, kidney ug atay. Matod sa popular nga mananambal nga si Dr. Willie Ong, ang kakuwang sa kahibalo maoy makapabutang sa tawo sa kadaot busa iyang gibatbat og tagsatagsa para maklaro kung unsay tinuod ug insakto nga mga binuhatan ug tinuohan pagbatok sa Covid-19.
Una. Kining pagkaon ka duha sa usa ka adlaw ining prutas nga saging o pag-inum sa tubig nga dunay lemon. Kining duha makatabang pagpahimsog sa lawas apan di kini tambal batok sa virus. Mas maayong mokaon og duha ka tasa nga lain–laing utanon o prutas matag adlaw labi na niadtong taas og bitamina C sama sa kahil, bayabas, mansanas, ug uban pa.
Sunod kining pagpa-init sa adlaw. Ok ra kaayo kung kini buhaton sa sayong buntag kay duna kini bitamina D. Ang kainit sab sa adlaw motabang pagpatay sa kagaw maong mas maayo nga ang mga sapot o gamit painitan una gamiton.
Apan ayaw intawon pag sun bathing sa udtong tutok kay dilekado kini sa lipong ug heat stroke kay mosaka man ang temperatura sa lawas.
Sunod kining paggamit sa alcohol. Ayaw kini himua og hiso sama sa cologne nga ipahid sa tibuok lawas kay gawas nga makadaot ug makapauga kini sa panit, maka-comatose sab.
Puno ni Dr. Ong, ipadayon ang paghugas sa kamot gamit ang sabon, pag sul-ob og mask, likayan ang paghikap sa nawong, ipadayon ang social distancing, magpuyo sa balay kung maglain ang lawas, kaon og daghang prutas ug utanon, positibo ang hunahuna ug binuhatan ug way undang nga pag-ampo.