TULO ka positibong kaso sa coronavirus disease (Covid-19) ang natala sa lalawigan sa Sugbo Byernes, Mayo 8, 2020.
Kini maoy gipahibaw ni Gobernador Gwendolyn Garcia atol sa press conference sa kapitolyo.
Duha sa maong kaso gikan sa dakbayan sa Talisay. Kini mao ang 61 anyos nga taga Rabaya St., Barangay Cansojong ug ang usa niini mao ang 39 anyos nga lalaki nga taga Barangay Dumlog.
Ang laing usa ka positibong kaso usa ka residente sa Barangay Pili sa lungsod sa Madridejos.
Matod ni Garcia nga ang pasyente nga taga Madridejos asymptomatic ug bag-o lang nanganak ug anaa gi-isolate sa Sacred Heart Covid-19 Center.
Sa kinatibuk-an, natala na ang 39 ka positibong kaso lukop lalawigan sa Sugbo. (ANV)