Pamilya ‘giapil’ og lista sa SAP

GITAHASAN ang buhatan sa City Legal sa Lapu-Lapu sa pagsusi sa gikatahong anomaliya nga naglambigit sa usa ka sakop sa City Social Welfare and Development (CSWD) human gireklamo nga unom ka mga sakop sa iyang pamilya naapil sa lista sa hinabang pinansiyal sa kagamhanan bisan di kuwalipikado.

Kagahapon, Mayo 8, gikomprontase ni Mayor Junard Chan si social worker Maria Leonor Feliciano nga na-detail sa Barangay Basak, human naabot sa iyang buhatan ang pasangil nga ang unom ka sakop sa pamilya niini nalista sa beneficiaries sa Social Amelioration Program (SAP) package.

‘Taghapan gyud?’

“Diha ba ka sa primero natong meeting sa distribution sa SAP? Unsay gisulti nako? Dili ta ni ipamolitika. Ako ingon ninyo (social workers) ihatag sa karapat-dapat angayang tagaan. Akong instruction nga ang atong pataga-an ang poorest of the poor,” tipik sa pamahayag ni Chan ngadto ni Feliciano.

Tubag ni Feliciano: “Dili baya kami nag house-to-house, Mayor, naa baya tay mga volunteer (nag-distribute sa SAP forms).”

“Akong pangutana, ikaw isip social worker nga naa sa Basak, ikaw ang in-charge, ikaw ang gisaligan sa gobiyerno, ikaw among gisaligan. Ngano imo mang pamilya, naa diha ang unom ka miyembro sa imong pamilya, imong gipatagaan?” pangugat sa mayor.

“Dili akoy naghatag mayor, ang volunteer. Lain-lain na sila (pamilya) og sityo,” pangatarungan ni Feliciano.

“Sa kadaghang residente sa Basak, silang unom nataghapan gyud?” kwestiyon ni Chan.

Dugang pa ni Feliciano nga human sa pagpa-fill up sa beneficiaries sa Barangay Basak sa SAP form, wa nay igong panahon ang mga kawani sa CSWD sa pag-validate sa listahan, sa wa pa iduso ngadto sa rehiyonal nga buhatan sa Department of Social Welfare and Development (DSWD).

Base sa reklamo nga naabot sa buhatan ni Chan nga lakip sa nakadawat og SAP ang giingong uyab sa anak ni Feliciano nga kawani sa airport, sister-in-law, igsuon nga lalake, laing igsuon kansang bana usa overseas Filipino worker, usa pa ka igsuong babaye nga nanimuyo sud sa usa ka subdivision kansang kapikas atua sa gawas sa nasud, ingon man ang iyang senior citizen nga inahan.

Sumala pa ni Chan nga human siya nakadawat sa maong reklamo, iya gilayong gipasusi.

Nasuta nga ang mga pangalan sa maong beneficiaries anaa sa payroll.

Samtang si City Legal Officer. James Sayson, sa iyang bahin, nagkanayon nga ang iyang buhatan mihimo na og fact finding ug hayan kasong administratiba (misconduct / gross misconduct) ang atubangon ni Feliciano.

Sa higayon nga mapamtud-an, posibleng suspension o ang pagkataktak sa trabaho maoy silot nga mapahamtang batok kang Feliciano.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph