WA PA lihoka sa Commission on Higher Education Central Visayas (Ched) 7 ang gipangayong mga umento sa tuition sa mga pribadong unibersidad ug kolehiyo sa Central Visayas tungod sa coronavirus disease (Covid-19) pandemic.
Matod ni Ched 7 Director Maximo Aljibe nga 37 ka mga tunghaan ang niduso sa proposal ngadto sa ilang buhatan alang sa umento sa school year 2020-2021.
Sagad sa mga tunghaan gikan sa Cebu City ug Lalawigan sa Sugbo, diin 30 ang nang-apply,
Gikan sa Negros Oriental upat samtang duha sa Bohol ug usa sa Siquijor.
Matod ni Alijibe nga ang deadline sa pag-submit sa application sa tuition fee increase niadto ra untang Abril 30, 2020 apan tungod sa kahimtang karon, hayan ilang lugwayan ang deadline.
"For now, probably late August or September ang opening of classes so for now, I think Ched will be able to come up with some policies of this prior to the opening of classes but now lahat nang applications ay extended," sulti ni Aljibe sa Sunstar.
Pipila sa mga tunghaan nga nangayog umento naglakip sa University of Cebu- Main campus, University of Cebu-Banilad campus ug University of Cebu- Lapu-Lapu and Mandaue campus.
Nangayo silag umento sa tuition alang sa umaabot nga freshmen, matod ni Aljibe.
Dunay mga tunghaan nga apil sa nangayog umento sa tanang level sama sa Asian College of Technology (ACT) ug Cebu Doctors University (CDU).
Matod ni Alijibe nga di pa sila makasulti kon uyonan ba nila o di ang gipangayo sa mga tunghaan kay layo pa ang pagbukas sa klase tungod sa Covid-19.
"I can't say pero sabi ko po na August paman ang opening eh baka naman ma lift na yung ECQ (enhanced community quarantine) at maging GCQ (general community quarantine) tayo until ma under normal, new normal baka may nga adjustment na gagawin," matod ni Alijibe. (JCT)