Dul-an lang sa 200 ka mga tawo sa 2,000 kapin nga target ang niapil sa ikatulong adlaw sa strategized community testing sa coronavirus disease (Covid-19) sa tulo ka mga barangay sa dakbayan sa Sugbo.
Ang grupo sa mga medical personnel gikan sa City Health Department ug Department of Health naka-test og 20 ka mga residente sa Barangay Kinasang-an, 49 sa Punta Princesa ug 119 sa Barangay Apas.
Ang 188 ka mga tawo nga nipa-ilawom sa rapid test pinaagi sa pagkuha og dugo diyutay ra kon itandi sa 2,124 nga maoy nakalista.
Si Kagawad Oliver Dingcong sa Kinasang-an niingon nga bisan kon ilang gipahibawo ang mga tawo ug gipang-adto pa sa ilang mga balay, gamay ra gihapon ang magpakuha og dugo para sa testing.
Gipadayag usab ni Kapitan Eleno Andales ss Punta Princesa nga gipahibawo sab nila ang iyang mga residente.
Ila pang gi-post pa ang mga pangalan ug nihimo sab sila og information drive, apan iyang gipadayag nga dili sab sila makapugos.
Labing daghan sa nagpa test mao ang barangay ni Kapitan Virgil Cabigon sa Apas kansang mga test gipahigayon sa ilang sports complex.
Sukad niadtong Mayo 6, moabot pa lang sa 651 ka ndividuals ang nakuhaan og blood sample.
Ang target sa siyudad nga makakuha og 20,363 ka individuals para maoy basehan sa ilang sunod nga lakang nga pagahimuon subay sa Balik Buhay nga programa gumikan sa grabeng epekto sa Covid-19-. (PAC gikan ni JJL)