NAKAGAWAS na sa usa ka pribadong tambalanan sa Dakbayan sa Lapu-Lapu ang 11 ka mga pasyente sa coronavirus disease (Covid-19) niadtong Biyernes sa gabii, Mayo 8, 2020.
Ang 11 ka mga pasyente naglakip sa pangulo sa City Social Welfare and Development Office (CSWDO) nga si Annabeth Cuizon. Gisugat ni Lapu-Lapu City Mayor Junard Chan ang naasoyng mga pasyente uban sa mga sakop sa City Health Office, Disaster Risk Reduction and Management Office (DRRMO), mga empleyado sa City Hall ug mga kabanay.
Nanghinaot si Chan nga daghan pang mosunod nga makarekober sa mga nagpositibo sa dakbayan sa mosunod nga mga adlaw.
Ang labing gihangop dihang migawas sa tambalanan mao si Cuizon kinsa maoy nangunay sa pag apod-apod unta og hinabang sa mga Oponganon atol sa krisis sa Covid-19, apan sa kalit nataptan sa virus.
“Thank you Lapu-Lapu City under the Chan administration. Salamat kaayo Mayor Ahong for taking care of your people. I love you,” pagpasabot ni Cuizon.
Katunga naka-recover
Sa kinatibuk-an sobra sa katunga kun 22 na ka mga pasyente sa 40 ka pasyente sa dakbayan nga nagka Covid-19 ang nakarekober ug nakauli na sa ilang tagsa-tagsa ka pamilya.
“Kahibawo ta unsay bation sa usa ka pasyente, nga karon ila nang mahangop ug ilang magakos ang ilang tagsa tagsa ka pamilya,” matod sa mayor.
“We are the direct descendants of Lapu-Lapu. Sama sa iyang paglupig sa mga banyaga 499 ka tuig na ang milabay, kita pud karon, atong ipakita nga atong lupigon kining virus. We have to work as one, in order to heal as one,” matod ni Chan. (GCM)