PAGKA-OFF air sa ABS-CBN sa kahanginan, natunga ang mga komento nga atong mabati may mga mipabor ug may mga misaway nga maayo ra nga natak-upan kay sobra ka daug-daugan sa negusyanteng gagmay diin kung komunikasyon ang pagahisgutan, apan kadtong gisayangan tungod sa ilang maayong programa mao kadtong nagasunod og tan-aw kanila.
Apan kung ang ABS-CBN maoy pasultihon, wala silay kalapasan nga nahimo ug kompleto ang ilang mga dokumento nga gisugmeter sa Kongreso niadto pang 17th Congress apan wala kini maaksyoni tungod kay daghan ang mga katarungan sa liderato sa Kongreso nga duna sila’y mga priority nga maoy unahon.
Ang asawa ni Juliano Tamano nga si Estrilita Tamano nga maoy presidente sa mga cable TV network milugwa na ug misulti sa dili daw maayo ang gibuhat sa ABS-CBN sa ilang mga gagmay nga mga negusyante nga may kalambigitan sa communication.
Kung tinuod ug kapamatud-an sa mga nagreklamo nga gi-abuso sa ABS-CBN tungod kay sila ang gibansagan nga higanteng network ang ilang black box nga dunay KBO nga gitawag sab nila nga TV plus, dili angay panapi-on apan ilang gipanapi.
Ila kining tubagon karon didto sa korte kay gisang-at man nila sa Korte Suprema ang pagpasira kanila sa National Telecommunications Commission (NTC) labot sa gipagula niini nga “cease and desist” order (CDO), nan, mahibaw-an nato pipila ka adlaw gikan karon.
Atong namatikdan ang Kongreso, Office of the Solicitor General (OSG) ug NTC, nagtinulakay labot sa pagtak-op sa operasyon sa higante nga network, apan, nganong ato paman nga liku-likoon kung nganong gipasira ug dina pwede nga i-renew ang ilang prangkisa?
Nga sukad sa paglingkod sa atong halangdong Presidente Rodrigo Duterte niadtong 2016, daan nata nahibalo nga mao ni ang dangatan sa ABS-CBN, kay kung asa ang iyang mga engagement kanunay naman niyang gibaharan kining maong network nga dili ug dili na-gyod sila ma-renew, di ba?
Sa unsang katarungan, sayod natang tanan nga daw gibinuangan sa ABS-CBN ang iyang political advertisement atol sa 2016 presidential elections, ang wala pagpagawas sa kahanginan sa ilang political ad.
Labaw sa tanan, gidawat sa ABS-CBN ang pangdaut nga political advertise ni Antonio Trillanes III ginamit ang mga bata nga wa’y buot sa mga pagpamatay nga nahitabo sa dakbayan sa Davao aron lang gub-on ang kandidatura sa atong mayor nga misalga sa presidential derby.
Nangayo og pasaylo ang mga kadagkoan sa ABS-CBN, buot ipasabot, gi-angkon nila ang ilang kasal-anan. Kung tinuod kining ilang gamay nga bikil nga gibutyag sa mga gagmay nga negusyante, wala kini daginuta kaniadto, tungod kay kaabin man nila ang mga nanglabay'ng presidente.
Apan gidimalas sila karong panahona kay dili na ila ang naglingkod nga presidente, sa laktud nga pagkasulti, naleksyon ang ABS-CBN sa ilang pagdapig sa politika. Matud pa’s panultihon sa akong amigong police coronel nga to-a na’s laing kalibutan, anhing Erning Macasaet, “sa buong buhay ng tao, may isang araw ka na malas” diin mao kini ang ilang gidangatan karon.