CENTRAL MINDANAO -- Duha ka tawo ang namatay human nibangga ang gisakyang sakyanan niini sa usa ka ten-wheeler truck alas 12:25 sa undto niadtong Sabado sa Probinsya sa Cotabato.
Giila ang namatay nga sila Police Master Sergeant Bayanga Bakal nga nadestino sa Maguindanao Police Provincial Mobile Force Company ug ang iyaan nga retirado nga magtutudlo nga si Salima Bakal Tuladteg Al-hadja, mga molupyo sa Datu Piang, Maguindanao.
Base sa imbestigasyon sa Libungan PNP, nga padulong na unta nga mopauli ang duha ka biktima sa Datu Piang gikan sa Cotabato City.
Apan, dihang pag-abot nila sa Barangay Baguer Libungan Cotabato atbang sa usa ka gasoline station, ni-overtake ang pulis sa gisundan nila nga laing sakyanan ug mibangga kini sa kasugat nga ten wheeler truck nga gimaneho ni Arnel Helardes, 28-anyos ug residente sa Barangay Sinuggoyan, Don Carlos, Bukidnon.
Gikataho nga dugay narespondihan ang mga biktima nga napiit sulod sa ilang gisakyan.
Dead on the spot ang pulis ug titser nga naka-angkon og grabing samad, bali ug pangos sa nagkadaiyang parte sa ilang kalawasan.
Gibutyag sa mga saksi nga kusog ang padagan sa sakyanan sa mga biktima dihang ni overtake kini sa laing sakyanan.
Sa pagkakaron, gibalhog na sa custodial facility sa Libungan PNP ang drayber sa truck samtang magpadayon ang imbestigasyon.