MOBALOR og P200 mil ang danyos sa sunog sa Sityo Isla Verde Lower Torre sa Barangay Inayawan, siyudad sa Sugbo, Dominggo sa hapon, Mayo 10, diin 25 ka mga balay ang naugdaw.
Si FO2 Emerson Arceo, duty investigator sa Cebu City Fire Department, niingon nga alas 12:58 sa udto nadawat ang alarma sa sunog samtang giisa dayon sa second alarm mga ala 1:12 sa hapon.
Giingong sa sudlonon nga dapit sa kabalayan sa maong sityo nagsugod ang kayo nga pulos mga ginama sa kahoy hinungdan nga dali nga nakakatap ang kayo.
Dugang ni Arceo nga sa ilang imbestigasyon sa miulbong sunog didto kini nagsugod sa panimalay sa usa ka Randy Torrejos.
Matod ni Torrejos, ang nakabantay sa pag-ulbo sa kayo kadtong iyang bisita nga pulis nga dunay sunog hinungdan nga dali siya nga nanghipos.
Nasayran nga didto sa usa ka kwarto sa balay ni Torrejos nagsugod ang kayo.
Padayon ang imbestigasyon sa kabomberohan.
"Dili nato malikayan nga nagtapok ra ang mga tawo sa ilang mga balay tungod lagi kay enhanced community quarantine (ECQ) mao na nga ang tanang balay tanan naggamit og kuryente tungod usab sa kainit sa panahon," matod ni Arceo.
Pagka ala 1:37 sa hapon, gideklarar nga kontrolado na ang sunog samtang milapas ang 20 minutos gideklara na nga fire out sa mirespondeng bombero.
Si Inayawan Barangay Captain Bryan Repollo sa interview sa Superbalita Facebook live miingon nga ang tanang mga nasunogan adto una temporaryo nga papuy-on sa barangay gym.
Human nga mag apud-apod sila og mga hinabang sa maong barangay sunod dayon nga hikayon ang pag-atiman sa mga nasunogan nga mga residente sa Inayawan.
Awhag ni Repollo nga sa panahon karon nga nag-atubang ang siyudad sa Sugbo sa krisis, hinaut nga mag-amping kanunay ang mga residente labi na nga grabe kainit sa panahon sa kasamtangan.
Samtang si Jimmy Claro, usa sa mga residente sa maong sityo kon diin ang iyang giabangan nga balay naapil sa pagkaugdaw, nanghinaut nga tabangan sila makabangon.
Gawas sa helmet sa iyang motor, mga sanina ra ang iyang mga nahipos.
Dugang ni Claro nga maayo nalang nga iyang motor anaa sa atbang sa iyang gipuy-an gi-park hinungdan nga wala masunog og apil. (BBT)