ANG Central Visayas (CV) dunay kinatibuk-ang 1,685 ka mga kaso sa Coronavirus disease 2019 (Covid-19).
Sa mao nga gidaghanon, 23 ang nangamatay samtang 43 kanila negatibo na sa sakit.
Base sa Mayo 9 nga update nga gipagawas sa Department of Health (DOH) 7 niadtong Dominggo, Mayo 10, ang rehiyon nitala og bag-ong 56 ka mga kaso sa Sabado.
Sa 56 ka bag-ong mga kaso, 39 ang gikan sa Cebu City; usa gikan sa Lalawigan sa Sugbo; 15 gikan sa Mandaue City Jail; usa niini apil sa repatriates.
Ang Cebu City nagpabiling dunay labing daghan og mga kaso sa Covid-19 nga naa sa 1,469; gisundan kini sa Mandaue nga dunay 109; Lapu-Lapu nga dunay 41; Cebu Province nga may 39; mga overseases Filipino worker nitala og 18; Negros Oriental upat; healthcare workers upat; ug Bohol dunay usa nga na-discharge na.
Nitala usab ang DOH 7 og dugang upat nga nangamatay sa Sabado. Tulo kanila mga residente sa Siyudad sa Sugbo samtang usa sa Lalawigan sa Sugbo.
Tanan, matod sa DOH 7, nangamatay tungod sa grabeng pneumonia dala sa Covid-19. Duna usab silay laing sakit.
Ang unang namatay niadtong Sabado mao ang 35 anyos nga lalake "who had recurrent history electrolyte imbalance."
Ang ikaduha ug ikatulo mao ang mga persons deprived of liberty (PDL) kun binilanggo gikan sa Cebu City Jail dormitory.
Ang ikaduhang namatay mao ang 32 anyos nga lalake samtang ang ikatulo 51-anyos nga lalake nga dunay sakit sa kidney.
Ang ikaupat nga namatay gikan sa Cebu Province, usa ka 39-anyos nga lalake nga hypertensive ug duna say massive stroke.
Sa sayo nga pamahayag, ang DOH 7 nipasabot kon nganong managlahi ang gidaghanon tali sa local chief executives ug natala sa national Covid-19 tracker.
Matod sa DOH 7, ang nagkadako nga kapasidad sa regional sub-national laboratory sa Vicente Sotto Memorial Medical Center (VSMMC) ug lapad nga coverage sa contact tracing teams niresulta sa pagdako sa positibo ug negatibong mga kaso.
Tungod sa mao nga rason, ang official Covid-19 figures gikan sa DOH langay og usa ka adlaw aron hatagan og higayon ang data validation ug verification.
Apan ang local government units hatagan og real time data nga ilang mapagawas alang sa publiko ug media. (WBS)