PATAY ang usa ka gwardya human gi-ulo pagpusil sa giingong nakalalis niini nga kaubang head guard mga alas 8 sa buntag adlawng Biyernes, Mayo 8, sa Purok 4 Lambo-lambo, Palacapao, Quezon, Bukidnon.
Ang biktima giilang si Armando Alejan, 46, minyo, residente sa dapit ug gwardya sa NASA Force Security Agency.
Ang suspetsado gitumbok nga mao si Karem Bayawon, head guard sa susamang security agency.
Sa inisyal nga imbestigasyon sa Quezon Police Station sa pagpanguna ni Police Captain Mitchel Clemencio giingong nagkalalis kining biktima ug suspek gani gibadlong ug gipataliwad-an pa sa watchman.
Nilakaw kadali ang suspek apan nibalik ug samtang naghigda sa duyanan ang biktima gi-ulo pagpusil hinungdan sa iyang kamatayon.
Ang suspek daling misibat dala iyang mga gamit samtang gibaharan niini ang watchman nga dili magreport kay patyon.
Sa pagkakaron gipangita na sa kapulisan ang nahimutangan sa suspetsado.