GISAWAY ni Cagayan de Oro City Mayor Oscar Moreno ang paagi ni Dr. Jerie Calingasan, ang chairman sa Provincial Task Force Covid-19 sa pakigbatok sa coronavirus disease sa Misamis Oriental.
Nakalatid sa bag-ong kamandoan ni Calingasan ngadto sa mga mayores sa kalungsoran ug duha ka siyudad sa Gingoog ug El Salvador City, nga ang taga Misamis Oriental nga naggikan sa Cagayan de Oro kinahanglan kung mouli sa lalawigan mobalik ra dili pa mag-alas 6 sa gabii kay sila ikonsidera nga person under monitoring ug ipaubos sa 14-day nga kwarantina labina nga ang siyudad sa Cagayan de Oro adunay pito ka kumpirmado nga positibo sa Covid-19.
"Nagmemo dayon siya. Iyang i-hold ang taga Cagayan de Oro against their will, unsa kani? This is kidnapping, lagi abduction. Hold ka? Ka tonto, until May 15? Gapugong unta ko pero malouy ko sa taga Cagayan ug Misamis Oriental, naperhisyo ani," matud ni Moreno.
"Sunod kining local transmission kay lagi local transmission is equivalent to enhanced community quarantine," matud sa mayor.
Gibiradahan usab niini si Calingasan nga pagpanimalos sa taga siyudad ang gihimo niini human tulo ka higayon nga wala kini niya gidawat sa giaplayan niini.
Sa bahin ni Calingasan, iyang gipaabot sa SunStar Superbalita nga dili kaayo siya gatumpang sa mga pahayag niini gumikan nakapokos siya sa pagprotehir sa probinsya.
"Dili nako batasan ang pagpanimalos. Ang tanan nahitabo sa akong kinabuhi kabubut-on sa Ginoo. Dili ko ikamahay ug ikasuko nga wala ko gidawat diha sa siyudad ug labina gyud ang ingon nga manimalos dili ko kana batasan," matud ni Calingasan ug miingon nga kalabot sa iyang pagwitik ni Moreno sa iyang advisory iya kining paagi aron maprotektahan ang katawhan.
"Bahin sa advisory nga iyang gibasa ni Mayor Moreno, it is our way of protecting the people of Misamis Oriental, kung among gibuhat ni Governor Bambi (Emano) is incovenient sa uban, that is the best practice that we can do to fight against Covid-19," matud ni Calingasan.