GIAKUSAHAN ni Cagayan de Oro City Mayor Oscar Moreno nga trabahante sa Kapitolyo ang caller sa trending nga 8888 kinsa misumbong sa kahimtang sa siyudad may kalambigitan sa Covid-19.
Ang 8888 mao ang hotline number ni Presidente Rodrigo Duterte diin mahimong ipaabot ang reklamo sa katawhan.
Madungog diha sa social media ang usa ka caller nga giilang si Bernardine Castillo nga mireklamo kalabot sa lokal nga panggamhanan sa Cagayan de Oro nga giingong hugak ang pakigbatok sa Covid-19 human gibutyag niini nga nagbukas na hinoun sa mga dagkong malls, adunay kumpirmadong local transmission taliwala paman nga pito ang kumpirmadong kaso sa Covid-19 sa siyudad.
Adlawng Sabado, Mayo 9, atol sa press conference gibulgar ni Moreno nga usa ka trabahante sa Provincial Tourism Department sa Provincial Government nga ginganlan niini nga si Leona Bagaipo Cabagnot, taga Zone 9, Upper Jasaan, Misamis Oriental ang "nagdrama" nga motawag sa 8888.
"Kadtong recording kunohay nga nagreklamo sa 8888? Naay nagtext sa ako kadtong nagtinagalog. Kadtong babae nga nitawag daw sa 8888? Drama rato nila, kadtong babae si Leona Fay Bagaipo Cabagnot, taga Upper Jasaan, naa nagtrabaho sa Tourism sa Kapitolyo. Ngil-ad kaayo jud, to demolish nako. Gareklamo siya," matud ni Moreno kinsa niingon nga makaduda ang gisulti niini sa tawag nga "doon sa Cdeo" nga imbes unta "dito sa CdeO" kung kini orihinal nga taga Cagayan de Oro.
Dugang niini nga gi tip kini sa silingan ni Cabagnot ug gi-text kaniya.
"So klaro nga dili siya taga diri apan taga Upper Jasaan, iyang silingan ang nagsulti nako. Abi guro nimo dikog research," dugang niini ug miingon nga si Cabagnot sakop ni Provincial Tourism head Jeffrey Saclot.
Sa bahin ni Saclot, nagpagawas kini og opisyal nga pahayag pinaagi sa iyang Facebook post.
"I just talked to Leona Cabagnot and she categorically denied she called 8888. Moreover, she is not my staff," pagklaro ni Saclot.
Dugang niini nga ang pagtumo-tumo sa sayop nga impormasyon nga may kalambigitan sa krisis nga giatubang karon ang makasuhan ubos sa RA 11469, o Bayanihan To Heal As One Act.
Samtang si Leona Cabagnot naghatag usab og opisyal niya nga pahayag pinaagi sa iyang Facebook post.
"Nakurat ko kay ako man gyud iyang gipasanginlan. Let me correct you, dli ko staff ni Atty. Saclot. Provincial consultant ko sa Capitol," butyag niini ug miingon mahimo siya nga mainterbyu aron makumpara iyang tingog.
"Dili gyod na ako ug klaro nga dili akong tingog ang nanawag. Ngano ako ang gipasanginlan? Unsay proof nimo?" dugang ni Cabagnot.
Gibutyag sab niini sa interbyu sa SunStar Superbalita nga pagpakaulaw ang gihimo ni Moreno sa iyang dungog ug buot niya nga mangayo og proof kalabot niini.
"Dako nga damage sa ako kay yano rako nga residente ug dili politician ug ako gi-pinpoint. Wala ko gisugo, dili ko mabaw ug sugoon ug magpagamit kay dili ko kalidad ang magpagamit bout kong hatagan og hustisya akong kaugalingon nga iya kung gipakaulawan," matud niini ug miingon nga grabe ka personal ang iyang pagmention sa pangalan.
Dugang niini nga nagtipas sab si Moreno sa topic sa presscon nga unta iyang ipokos ang panghitabo unsaon pagsulbad sa coronavirus aron luwas ang katawhan sa siyudad.
"Ako siya hagiton nga isaba kinsa ang nagsulti kay dako nga bakak iyang pagpasumangil sa ako. Willing ko magpa lie detector test kay 101 percent akong konsensya nga nagsulti ko sa tinoud," dugang niini.