TALIWALA sa kahadlok ug kakulba nga gibati sa duha ka magklasmeyt nga nurse nga unang moserbisyo sa ilang propisyon karong panahon sa krisis, apan wala kini magpugong sa ilang gusto nga moserbisyo.
Ang maong mga nurse mao silang Avriel Bihag, 22, ug Jesha Inoc, 21. Ang duha nagpuyo sa dakbayan sa Mandaue.
Bag-o lang nakapasar sa board si Bihag ug si Inoc niadtong Disyembre 2019.
Tungod sa pagbutho sa coronavirus disease 2019 (Covid-19) niadtong Enero karong tuiga, wala dayon makapangita og trabaho ang duha tungod gipugngan kini sa ilang ginikanan gumikan sa hulga sa Covid-19 ngadto nila.
Apan wala kini makapahunong nila nga mo-apply aron mamahimong nurse.
Mi-apply si Bihag ug Inoc sa ubang dakbayan sama sa Talisay ug siyudad sa Sugbo apan wala sab misugot ang ilang ginikanan tungod kay layo kini nila.
Sigon ni Bihag nga kasabot siya nganong gipugngan siya sa ilang ginikanan tungod ang iyang inahan usa sab ka nurse ug kahibalo kini kon unsa kalisod ang ilang trabaho sa panahon sa pandemic.
Nangita sab ang ginikanan ni Bihag nga mas duol sa ilang panimalay.
Ug niadtong gitukod ang quarantine facility sa Mandaue City Central School ug nangita kini og mga nurse, medical technologists ug mga doctor ang maong pasilidad, wala na nagduha duha si Bihag ug Inoc nga mo-apply.
Nalipay ang duha nga ang unang higayon nila nga mobansay sa ila propesyon karong panahon sa pandemic apan dili sab nila malikayan nga mahadlok ug makulbaan.
"Of course nahadlok ko pero if ang mindset man gud sa tanan kay mahadlok, nya mahadlok ang isa ka nurse nya what if kami tanan mahadlok kinsa namay moatiman sa mga tawo," sigon ni Bihag.
"Kulba gihapon pero pareha sa iyang giingon nga kung kinsa ang mosukol ani kinsa man?" matod sab ni Inoc.
Bisan og daghan sab ang moabiso kanila nga pahumnon usa ang Covid-19 una sila mobansay sa ilang propesyon, apan alang kang Inoc, kanus-a paman mahuman ang maong pandemic.
Niboluntaryo sila aron moserbisyo ug motabang og atiman sa mga pasyente ug motabang sa pagsugpo sa maong virus.
Kampanti na sab ang mga ginikanan ni Bihag ug Inoc tungod adunay gihatag nga akomodasyon ang maong pasilidad aron dili na sila mouli sa ilaha ug makahatg sab og risgo sa ilang pamilya.
Kampanti ra sab sila nga wala sila pasagdi sa lokal nga pangagamhanan labi na sa mga personal protective equipment suits nga ilang suoton sa panahon nga mo-duty na sila.
Apan ang importante alang kang Bihag ug Inoc ang ilang kasingkasing sa pagserbisyo ngadto sa mga Mandauehanon.