KON manghatag ta og hinabang labi na gyud sa panahon karon, dili malalis dalaygon gyud kana. Apan, kon duna kay dautang motibo sa pagpanghatag, nan, salikwaot gayud.
Sa miaging adlaw, giimbetar si kanhi Senador Jinggoy Estrada sa police station tungod kay nag-apod-apod og bangus didto sa mga barangay sa San Juan City.
Walay permiso ang kanhi senador sa pagpanghatag og pagkaon ngadto sa katawhan. Nakalapas sab siya sa gipatuman nga enhanced community quarantine.
Gihatagan lang og warning ang kanhi senador. Wala siya gibalhog o gisilotan segun sa balaod. Kon ang yanong molupyo pa to, segurado nagkatingking na sa silot.
Unsa may mensahi nga gipasantop ni Estrada ngadto sa publiko. Unsa pud ang mensahi nga gipatugbaw sa kapolisan ngadto sa katawhan.
Tataw nga gipakita ni Estrada ang iyang pagka-abusado sa balaod. Dili ta motuo nga wala siya mahibaw kon nagkinahanglan ba og permiso sa gobiyerno kon mag-apod-apod ta og relief goods. Timan-i usa siya ka kanhi magbabalaod sa senado.
Labaw nang dili katuohan nga wala siya mahibaw unsay kahulogan sa ECQ.
Sa kabahin sa kapolisan, ilang gipakita lamang unsa kainutil ilang pagpatuman sa balaod. Duna bay giingon sa balaod nga kon kanhi dakong opisyal sa gobiyerno makalapas pasayloon lang. Pananglit kon nakaligis kini si kanhi senador Estrada unya gibiyaan niya ang biktima, wa ba siyay tulobagon ug pasayloon lang ba. Gamay nga kalapasan sa balaod, sa ngalan nga nakasupak ka, sala gihapon kana. Di ba?
Nakaseguro ba ang kapolsan sa San Juan City nga nahimuot ang publiko sa pagpalingkawas nila ni Estrada? Nabaniog kining hitabo sa tibuok nasod, ug daghang yanong molupyo, labi na kadtong nakalapas sa ECQ nga gipangdakop ang wala gyud malipay sa gihimo sa kapolisan ngadto sa kanhi magbabalod.
Sa panahon karon, ihiklin lang una nato ang pamolitika, ug ipadaplin sab nato kining pagpakita og pabor sa mga "dagkong" tawo sa katilingban kon nakalapas sa balaod.
Ipatunhay kanunay ang hustisya, kaangayan ug katarungan. Niining hitaboa karon, nakita ba nato kini.