PIPILA sa mga pulitiko, pribadong sektor, mga doktor ang nanawagan nga ipaubos na sa enhanced community quarantine (ECQ) ang siyudad sa Cagayan de Oro.
Kini gumikan adunay pito ka mga kaso sa Covid-19 sa dakbayan ug gikumpirmar sa Department of Health (DOH)-Northern Mindanao nga adunay local transmission ang siyudad.
Si Misamis Oriental Governor Bambi Emano nagpadala og sulat niadtong Miyerkules ngadto kang Presidente Rodrigo Duterte uban sa endorsement letter gikan sa Regional Task Force for Covid-19 apan hangtod karong panahona, wala pay tubag sa maong sulat.
"Among mabuhat maghulat ug mag-appreciate sa IATF sa national kung ihatag ba kini nila nga prelibihiyo o katungod o ihatag kana nga gahom nga isaka sa ECQ pero kung moingon ta karon nga oo o dili maghulat lang gyod mi kay dili man pwede mangibabaw sa IATF," matud ni Emano.
Samtang si Second District Representative Rufus Rodriguez nibutyag sab nga siya mihangyo nga patas-an ang level sa kwarantinas sa siyudad. Una iyang gisuportahan ang lakang ni Mayor Oscar Moreno nga ipaubos sa general community quarantine gumikan kay gamay pa ang kaso niadtong tungora.
"Misuporta kita sa deklarasyon sa GCQ. As of May 7, pito na ang positibo. Kita gyod naghangyo kang Mayor Moreno uban sa rekomendasyon sa DOH nga magdeklarar na ang siyudad og ECQ aron mapugngan ug masangka nato ang pagsaka sa Covid 19 kay prevention is better than cure," matud niini.
Mihangyo usab si Rodriguez nga tagaan og igong assistance ang katawhan aron makapuyo sa ilang tagsa-tagsa ka panimalay.
Adlawng Biyernes usab atol sa press conference sa 26 ka mga kapitan kauban ang hugpong nga Luwas Kagayan diha sa Barangay Lapasan, nanawagan sa mayor nga ipaubos na og ECQ ang dakbayan.
"Gitukod namo ang luwas Kagayan aron irepresentar dili lang ang among barangay. Among girepresentar ang nagkadaiyang grupo kung diin ang ilang sintiyemento mao lamang ang pagpatunhay sa ang pagpaninguha nga masulbad kining Covid-19," matud ni Barangay Kapitan Ian Achas, sa Puerto.
Una na nga nagpetisyon ang pipila ka mga doktor nga naghangyo sa mayor nga mas pahugtan ang seguridad sa pakigbatok sa Covid-19.
Si Moreno sa iyang bahin nagpasabot nga misunod siya sa guidelines sa Inter-Agency Task Force on Emerging Infectious Diseases (IATF-EID) National nga ang siyudad ubos sa gabayan sa GCQ.
Dugang sa mayor nga dili pasabot nga adunay local transmission, deretso dayon ipaubos og lockdown labina nga adunay solusyon niini ug gihimo na nila og maayo ang intensified monitoring and surveillance ug contact tracing sa mga area sa Pinikitan Camaman-an, Carmen ug Barangay Lumbia kon diin dinhi nagikan ang mga nagpositibo sa Covid-19.
Dugang niini nga gihimo sa pipila ang local transmission nga adunay lain nga agenda.
Gipasabot sab niini nga kung mogawas gyod ug kamandoan ang DOH nga angayan na ipaubos sa Enhanced community quarantine ang siyudad iyang respetuhon ang desisyon.
Sa pagkakaron, ang siyudad adunay pito ka kumpirmadong nagpositibo sa Covid-19 kung diin upat niini nakabsan sa kinabuhi, duha ang asymptomatic ug ang isa ang nakarekober na.