ADUNAY walo ka bag-ong mga kaso sa nagpositibo sa coronavirus disease 2019 (Covid-19) sa Probinsya sa Sugbo.
Kini naa sa Cebu Provincial Detention and Rehabilitation Center (CPDRC), matod ni Gobernador Gwendolyn Garcia sa press conference sa Kapitolyo Lunes, Mayo 11, 2020.
Ang walo ka mga piniriso mogawasay na unta, apan nasayran sa bag-ong resulta nga nagpositibo kini hinungdan nga padayon sila nga gi-isolate sa usa ka pasilidad.
Si Garcia nagkanayon nga ang unang batch sa mga piniriso nga nagpositibo sa Covid, wa na makasinati og simtomas.
Apan ipaubos gihapon sila sa laing pagsulay aron masiguro nga luwas na sa sakit.
Samtang laing usa ka indibidwal nga giingong nahisakop sa probinsya ang nagpositibo sa Covid-19.
Apan wala mibutyag si Garcia kon asa kini nga lungsod gikan sanglit gipaubos pa sa verification ang pasyente.
Sa kinatibuk-an moabot sa 49 na ka mga positibong kaso ang natala sa lalawigan.
Subay niini padayon ang pag monitor sa Lalawigan sa moabot 4, 053 ka mga persons under monitoring (PUM) ug 12 ka mga pasyente nga nakasinati ug influenza-like illnesses.
Hinuon may natala nga 73, 979 ka mga Sugboanon ang gawasnon ug nakakompleto na sa 14 ka adlaw nga quarantine. (ANV)