KAGULIYANG? Sa unang adlaw, Mayo 6, 2020, sa rapid testing sa dakbayan sa Sugbo klaro nga kahadlok ang nagpalabi sa mga kadaghanan nga nagpalista tungod kay wa manunga. Gani, ang mga opisyal na lang sa barangay ang nagpa-test.
Ang kakuwang sa pagpasabot sa katawhan maoy usa sa mga rason sa kabalaka sa resulta unya sa testing. Sa Barangay Subangdako daghan ang nagpatesting sa unang adlaw ingon man sa Barangay Opao ug Cambaro, Mandaue City. Matod ni Subangdako Brgy. Capt. Ernie Manatad nga misobra sa lista ang nagpatesting tungod sa ilang maayo nga pangampanya sa katawhan.
Niadtong Dominggo, Mayo 10, sa Cebu City midaghan ang miapil sa rapid testing, usa ka pamaagi sa paghibawo kon ang usa ka tawo daghan ba og antibodies.
Dili sad tinuod nga nahadlok ang kadaghanan sa taga dakbayan sa Sugbo tungod sa giingon nga dili pagsugot ni Cebu City Health Officer Daisy Villa sa rapid testing kay, matod pa, di pa kini aprobado sa Food and Drugs Administration (FDA). Gani, nagkabangi sila si City Administrator Jun Casas ug Villa kabahin apan karon nahusay na. Dunay mga hungihong nga di maayong balita alang kang Dr. Villa tungod sa mga panghitabo nga atong maingon nga kuwang lang sa koordinasyon. Matod pa ni Casas lisud kontakon si Villa.
Manghinaut ta nga masulbad ning maong kaguliyang ubos sa administrasyon ni Mayor Edgar Labella.
Hinabang. Atong gipasalamatan ang atong mga front liners, mga doctor, nurse, health workers ug kapulisan ning gubat batok sa Covid-19 tungod sa risgo nga ilang giatubang. Daghan na ang nataptan sa mga doctor, nurse ug pulis, ang uban kanila nangamatay. Ato usab pasalamatan ang mga pundok nga nanghatag. Ang Batch 94 sa UV College of Nursing, gipangulohan nila ni John Neil Perales ug Rowena Montesioso, nIdonar og 950 kabuok nga face shields sa probinsya ug 50 kabuok sa dakbayan sa Talisay. Kadaghanan kanila nagtrabaho sa gawas sa nasud.
Ang Rotary Club Cebu South ubos ni Ed Bauzon, nagpakaon usab sa mga “poorest of the poor” nga nisamot ang ilang kalisod karon.
Sulod sa 10 ka adlaw sa miaging buwan ang RC Cebu South nagpakaon og paniudto sa mga taga Arca, Tuburan, Enriquez ug Little Baguio, sa Brgy. Punta Princesa.
Kini nga proyekto gipasiugdahan ni Jack Torrejos, tsirman sa committee on education and public relations sa RC Cebu South. Kapin sa P30,000 ang nagasto sa RC Cebu South alang sa pagkaon nga giamotan sa mga sakop. Daghang salamat sa inyong hinabang!