SUGOD karong adlawa, Miyerkules, Mayo 13, 2020 abli na ang district offices ug extension offices sa Land Transportation Office (LTO) 7 sa lalawigan sa Bohol, Negros Oriental ug Siquijor.
Tungod kay nagpabilin nga anaa sa modified enhanced community quarantine ang Sugbo, magpabilin kini nga sirado.
Base sa memo ni LTO 7 Regional Director Victor Caindec, mobalik na sa ilang trabaho o office operations ang mga buhatan sa LTO sa Bohol, Negros Oriental, ug Siquijor subay na usab sa Memorandum Circular 2020-2183 ni Assistant Secretary Edgar Galvante.
"All LTO 7 offices under the general community quarantine will follow a four days workweek working schedule from Monday to Thursday with 10 hours shift and 1-hour lunch break per day between 7:30AM and 6:30PM," tipik sa memo ni Caindec nga gipadala ang kopya sa Superbalita Cebu.
Lakip sa district offices ug extension offices ang Tagbilaran City DO, Jagna (Garcia-Hernandez) DO, Tagbilaran DO Licensing Extension Office (Altural Mall), Talibon EO, ug LLRO-ICM sa Bohol.
Sa Negros Oriental abli na usab ang Dumaguete City DO, Bais City DO, Bayawan City DO, La Libertad DO, ug DLRO-Robinsons Place.Samtang abli na usab ang Siquijor DO.
Bisan paman nga abli na ang mga buhatan sa LTO 7, aduna gihapoy mga gikinahanglan nga ipatuman aron magpabilin nga luwas sa Covid-19 ang maong mga lugar nga anaa na sa general community quarantine.
Di makasulod sa mga buhatan sa LTO 7 ang di mag-mask, adunay social distancing, i-temparature check pinaagi sa thermal scanner ang mga kliyente nga mosulod, foot bath nga gamiton, ug aduna'y alcohol nga i-spray sa kamot sa kliyente.
Nasukip sa memo ni Caindec nga hatagan og 60 ka adlaw gikan sa pagsugod sa trabaho sa LTO 7 ang mga nanag-iya og sakyanan nga napupos na ang rehistrasyon niini.
Kini alang sa mga na-expire sa Marso, Abril ug Mayo.
"For new registration, no penalty shall be collected for those vehicles purchased or with sales invoices from 05 March 2020 up to work resumption, if the sale is reported within fifteen (15) calendar days upon work resumption," tipik sa memo sa regional director.
Gihatagan usab og extension nga 60 ka adlaw kadtong mga lisensiya nga na-expire sukad Marso 16 hangtod nibalik ang trabaho sa LTO.
Dugang ni Caindec nga alang sa Sugbo, unya na moabli pagbalik ang buhatan sa LTO lukop Sugbo kon anaa na sa GCQ nga low ug moderate risk ang quarantine status niini. (HBL)