DAVAO DE ORO -- Nahimong away sa mag-asawa ang wa pagpahalok sa babaye sa bana nga miuling hubog, wa magsul-ob og face mask ug nanimahong tuba.
Kini ang gibutyag sa 23-anyos nga dalaga nga nagpatago sa pangalang Nelia nga nahinabi sa SunStar Superbalita pinaagi sa selpon nga sumala pa niya nga ang iyang maguwang babaye nga ginganlan og Grace ug bana nga si Ondoy labihang away nga diriyot musangko sa panagbulag.
Matud pa nga lagpas sa oras sa curfew nga miuli sa balay ang bana nga si Ondoy gikan sa patagong inom sulod sa balay sa ilang silingan nga nagsaulog og birthday.
Gibutyag nga gipangita sa asawa ang face mask nga gisul-ob sa bana apan, nalimot ang lalaki kung asa nahibilin og sa dihang buot muhalok sa asawa, wa magpahalok ang babaye ug giingna’g baho’g baba ang bana.
Nasuko ang lalaki labi na dihang giingnan nga makahalok lang kini kung makit-an ang nawalang face mask nga wa pa maimpas human giutang gikan sa online pautang.
Nagkalalis ang duha nga misangko sa siningkahay ug mas milala dihang miingon ang lalaki nga sa iyang “kumare nalang siya muhalok nga kuno seksi na, humot pa, di sama sa iyang asawa nga tambok ug nanimaho pang kagwang”.
Milungtad og pipila ka oras ang away apan, suma pa ni Nelia nga nagkauliay ra sa buot ang duha human nakit-an pagka-ugma ang nawalang face mask nga nabilin sa balay sa ilang silingan.
Dugang pa ni Nelia nga nadala ra sa gitik-gitik ug hapyod-hapyod sa bana ang mao niyang maguwang hinungdan nga naulian ra ang kasuko.