BISAN si Madonna, ang sikat nga singer, wa makalingkawas sa coronavirus. Gikanselar niya ang umaabot nga konserto sa Paris gumikan sa iyang pagkasakit.
Kon buot hunahunaon, grabe ang seguridad ni Madonna gikan sa publiko. Busa, dili gyud unta siya angay mataptan sa maong sakit.
Nahibaw ta nga dunay mga opisyal sa atong gobiyerno ug mga adonahan nga nangatakboyan usab sa maong sakit.
Unsa pa kaha kining ordinaryong mga tawo. Unsa ka kahuyang sa ilang seguridad batok sa Covid-19.
Pagkakaron, moabot na ngadto sa 10,794 ka mga kaso sa coronavirus dinhi sa Pilipinas. Gi-report sa Department of Health ang dugang bag-ong kaso nga 184 niadtong Dominggo. Sa kinatibuk-an moabot na ngadto sa 719 ang nangamatay gumikan sa maong virus.
Sama sa ubang nasod, gipatuman kining lockdown ug quarantine. Kana, dependi sa matag local government unit.
Wa man tingali mapakyas atong gobiyerno paghimo og lakang aron mapugngan kining pagkuyanap sa virus.
Hinuon, kon itandi sa ubang nasod medyo naulahi gyud og gamay ang Pilipinas sa pagpangandam aron masumpo kining makatakod ug makamatay nga sakit.
Ang problema niini mao nga bisan sa gipatuman nga lockdown ug enhance community quarantine naa gihapoy gahi og ulo nga mosupak sa maong polisiya.
Pero magpasalamat nalang ta sa sitwasiyon nato sa Pilipinas kay kon lantawon nato ang ubang nasod mas grabe ang ilang epekto sa Covid-19.
Gani, sa ubang estados sa Amerika gipasira gyud nila sa hingpit ang mga simbahan apan abli ang mga bar ug tindahan nga nagbaligya og alak.
Mas gubot didto sa ilaha kay dunay nagprotesta pagsupak sa lockdown. Nanggawas sila sa karsada ug gipadayag ang ilang gusto nga kagawasan.
Kumusta man dinhi sa atong palibot. Makatagbaw ba ang gihimo nga programa sa goibyerno batok sa Covid-19?
Sayon ra ba gyud unta sumpoon kining maong sakit.
Sulayan kaha nato pagsud-ong unsay gibuhat sa nasod sa Vietnam ug Taiwan. Nganong nakabalik naman sila sa ilang normal nga panginabuhi? Giunsa nila pagpakgang ang maong virus? Nganong minus ra kaayo ang ilang kaso sa Covid-19 ug maihap lang sa tudlo ang nangamatay.
Kana, gumikan ra gyud sa tinuod nga kooperasiyon sa katawhan. Ilang gisaligan pag-ayo ang gobiyerno ug mituo sila sa gipatuman nga programa niini.
Dinhi sa atua, makiglalis pa gyud ta sa awtoridad bisan klaro na nga nakalapas ta sa balaod. Ang kinaiya usahay sa mga Pinoy ayha ra mokalma kon motagam na.