NABALAKA si Misamis Oriental Governor Bambi Emano sa panglawas sa katawhan sa pakigbatok sa coronavirus disease (Covid-19) human nagpagawas og bag-ong kamandoan ang Inter-Agency Task Force on Emerging Infectious Diseases (IATF-EID) sa nasyunal nga low-risk provinces ug dili na ubos sa community quarantine ang Misamis Oriental ug Cagayan de Oro sugod sa Mayo 16, 2020.
Kini bisan paman sa iyang apela nga unta ipaubos sa enhanced community quarantine ang Misamis Oriental lakip ang Cagayan de Oro gumikan sa kumpirmasyon sa Department of Health (DOH) nga aduna nay local transmission.
Gani si Emano ang nagpadala og sulat didto kang Presidente Rodrigo Duterte naghangyo sa IATF sa national nga mas pahugtan ang kwarantinas sa lalawigan ug siyudad sa Cagayan de Oro apan kagahapon, Mayo 12, ang spokesman ni Presidente Rodrigo Duterte nga si Secretary Harry Roque naghatag sa listahan sa mga lugar nga dili na ubos sa community quarantine ug nalakip ang Cagayan de Oro ug Misamis Oriental.
Dugang niini nga gikabalaka niya ang panglawas sa katawhan batok niining dili makita nga coronavirus disease apan nasabtan ang hukom sa IATF nga maoy mas nasayod.
"Maybe IATF knows better. As of now, I fear for my people's health versus Covid," kini ang pahayag ni Emano.
Sa laing bahin, gipahibalo ni Emano nga nahidangat na ang 6,250 ka mga diagnostic kits sa Misamis Oriental ug gitakda kining iapod-apod ngadto sa 24 ka lungsod ug duha ka siyudad sa probinsya.
Taliwala pa man nga wala pay kaso nga natala sa Misamis Oriental, bout niini nga anaa nakaandam kining test kits kung ugaling adunay ma monitor nga mga suspek sa coronavirus disease.