PERSONAL nga miadto sa Manila si kanhi Davao del Sur Integrated Bar of the Philippines (IBP) President Israelito Torreon sayo kagahapon sa buntag.
Mga alas 8:00 pasado sa dihang pormal nga gitunol ni Torreon didto sa Korte Suprema ang ilang gipasakang “motion for reconsideration” aron ipabakwi ang gahom nga pagtugot ni Presidente Gloria Macapagal-Arroyo sa pagtudlo og mosunod nga Chief Justice duha ka bulan una mahitabo ang eleksyon.
Si Torreon, kinsa nahinabi sa Sun.Star Superbalita sa iyang telepono samtang didto na kini sa Davao International Airport una pa milupad sa Manila, nagkanayon nga kuyog niya ang pipila ka mga opisyal ug miyembro sa Association of Law Students of the Philippines.
Sila maoy motunol sa ilang mosyon ngadto sa Korte Suprema.
"This is our way of dramatizing our request for the 9 SC (Supreme Court) justices, who voted in favor of GMA's (Arroyo) authority to appoint the next Chief Justice despite the blanket prohibition under the 1987 constitution to change their minds," pagklaro ni Torreon.
Naghiusa ang IBP Davao del Sur ug Davao City sa panawagan nga bakwion sa labing taas nga hukmanan ang pagtugot ni Arroyo nga motudlo og hulip ni Chief Juctice Renato Puno kinsa mahuman sa iyang termino karong Mayo 17.
Gidason sab niini nga angayang suportahan sa mga kongresista ang ilang hangyo tungod kay sila ang unang nasayod sa maong balaodnon.
"The rule of law must prevail and not the dictates or whims of a fading but infamous regime," ni Torreon pa.
Sumala sa IBP nga bisan ang katawhan, angayan masayod kung unsa ang mga nahitabo ug buot himuon sa administrasyon ilabi na nga usa ka dakong sayop ang pagtugot sa presidente subay sa balaod. (Orlando B. Dinoy)