MIKIRIG ang usa ka lalaki human nakuryenti niadtong Huwebes mga alas 6:00 sa gabii sa Tabok, lungsod sa Opol, Misamis Oriental.

Giila ang biktima nga mao si Sonny Boy Yana,20, sa susamang lungsod.

Matud sa personahe sa Northern Mindanao Medical Center (NMMC) nga nahinabi sa Sun.Star Superbalita, walay sunog nga naangkon si Yana dihang gidala sa balay tambalanan apan gibutyag sa biktima nga grabe ka hawoy ang kalawsan niini tungod kay atol sa pagkuryente anaa man kini nahumol sa tubig.

Gisaysay sa mga higala sa biktima nga nangaligo sila niadtong tungora sa swimming pool dihang nakahawid og live wire ang usa sa kauban niini.

Si Yana niadtong tungora anaa sa swimming pool naglangoy apan nahuptan niini ang puthaw nga gihawiran sab sa iyang higala hinungdan nga siya ang mikirig samtang ang higala wala.

Gibati og kakapoy sa lawas ang biktima human nabuhian niini ang puthaw, hinungdan nga nagdesisyon ang mga higala nga patambalan kini sa NMMC ning siyudad sa Cagayan de Oro.

Wala sab gibasol sa biktima ang higala nga unta maoy nakuryente.

Tuod man luwas kini sa makuyawng kahimtang ning panahona apan nagpabilin kini sa balay tambalanan aron masusi pag-ayo sa doktor ang kahimtang sa biktima. (SVB)