NANGANDAM na ang sakop sa Cagayan de Oro City Police Office (Cocpo) kalabot sa umaabot nga kasaulogan sa Semana Santa labina ning siyudad sa Cagayan de Oro.

Si Police Inspector Ullyses Gere, hepe sa Police Station 10 (PS10) sa Cugman, nibutyag sa Sun.Star Superbalita nga aduna na silay gihimo nga security plan kalabot sa umaabot nga Semana Santa.

Labina nga sa area niini natigayon ang pagpanetisya sa katawhan nga naglangkob sa Guadalupe Church ug ang Malasag Garden.

Matud ni Gere nga adunay ibutang nga polis sa entrance nga bahin paingon sa Malasag Garden. Matag mosulod nga mga tawo, kakapkapan ug susihon ang mga dala.

Gisiguro niini nga walay makasulod nga mga ilimnong makahubog ingon man mga armas ug hinagiban subay sab sa giobserbar nga gun-ban.

Gisiguro nga adunay nakabantay nga polis sa matag estasyon sa krus.

Samtang sa Guadalupe church, diin lakwon ug latason sa pipila ka suba, aduna gihapon ibutang nga mga polis uban sa koordinasyon sa kapolisan sa Police Station 6 (PS6) sa Puerto ug Roads and Traffic Administration (RTA).

Gituohan nga mas modaghan pa ang magpenetistya karong umaabot nga Holy Week kon itandi sa nilabay’ng tuig. Gani sa record nga natala, moabot ngadto sa 6 mil ka tawo ang nibisita niini ug 10 mil ka tawo sa Malasag.

Apil sa gibantayan ang mga terminal sa nagkadaiyang dapit ning siyudad.

Gipanawagan ni Gere nga unta ang katawhan dili na magdala sa mga gidili aron hapsay ug malinawon ang pagsaulog sa Semana Santa.