GIPAABOT pa ang resulta sa swab sample sa duha ka mga pasyente nga namatay kinsa coronavirus disease (Covid-19) suspects nga na-admit diha sa Northern Mindanao Medical Center (NMMC), dakbayan sa Cagayan de Oro.
Ang maong mga pasyente nga namatay niadtong Mayo 12 pulos taga Misamis Oriental diin ang usa taga lungsod sa Opol ug ang usa sa Initao.
Unang namatay mga alas 12:36 sa kaadlawon mao ang 52 anyos nga lalaki tungod sa severe head injury secondary to vehicular accident, ug duna’y brain herniation. Giingong kritikal na kining daan sa dihang nadala sa ospital tungod sa aksidente ug naay bleeding sa utok. Gidugang pa nga sa dihang gipaubos sa X-ray nakita nga duna kini pneumonia rason nga gibalhin sa emerging and re-emerging infectious disease (ERID) ward aron sa pagpaniguro.
Samtang ang laing suspect mao ang 53 anyos nga lalaki kinsa namatay mga alas 12:19 sa udto sa susama nga adlaw. Giingong duna na kini severe heart failure, chronic kidney disease o acute kidney injury ug duna’y community acquired pneumonia nga high risk, ug coronary artery disease. Namatay ang maong pasyente tungod sa cardiogenic shock secondary to acute coronary syndrome non st elevation myocardial infarction o gi-atake sa kasing-kasing sa dihang anaa sa ospital.
Gibutyag ni Dr. Bernard Rocha, Medical Specialist II sa NMMC nga gikonsidera nga mga suspect sa Covid-19 ang maong mga pasyente human nga dunay nakitang sintomas usab sa maong virus labi na nga duna na kini silay mga health conditions.
“Kining duha na namatay sa amoha were swabbed katong May 12 so awaiting nalang ang results ana,” matud ni Rocha.
Kahinumdoman nga sa probinsya sa Misamis Oriental wala pa’y confirmed Covid-19 nga kaso sa pagsulat niini nga balita.