Cebu City modified quarantine ‘lugak’

LUGAK nga modified enhanced community quarantine (MECQ) ang ipatuman sa Dakbayan sa Sugbo gikan sa Mayo 16-31, 2020.

Mas daghan nang mga balay patigayon ang tugtang mangabli ug mahimo nang maka-exercise sa gawas.

Di hinuon sayon ang pagbukas sa patigayon kay kinahanglan ang tanang mga kawani ipailawom sa rapid diagnostic test sa coronavirus disease 2019 (Covid-19).

Mahimo na tuod nga maka-exercise sa gawas pinaagi sa running, biking ug jogging, apan kinahanglan nga mag-mask ug mag social distancing gihapon.

Kinahanglan usab nga duol sa balay ang pag-exercise.

Si Cebu City Mayor Edgardo Labella niluwat sa iyang Executive Order no. 077 alang sa guidelines sa pagpatuman sa MECQ subay sa nalatid sa guidelines nga giumol sa Inter-Agency Task Force for the Management of Emerging Infectious Diseases (IATF-MEID).

Ang MECQ gitumong alang sa hinayhinay nga pagbukas ug pagpabangon sa ekonomiya nga apektado kaayo sa Covid-19.

Epektibo gihapon

Bisan kon ubos na sa MECQ ang Dakbayan, gipatuman gihapon ni Labella ang number coding sa mga sakyanan.

Bisan ang letter coding sa pagpangompra sa merkado publiko sa Carbon anaa lang gihapon.

Padayon gihapon nga epektibo ang kamanduan ni Labella nga stay at home kun magpuyo sa balay.

Apan sa stay at home, gitugotan gihapon nga makagawas kadtong mga nalatid sa iyang kanhi mga EO, sama sa frontliners.

Ang ECQ pass nga giisyu sa Siyudad mao gihapon ang gamiton kon ang sakop sa pamilya mogawas sa balay para pagpalit og essential goods.

Sa EO ni Labella, ang mga kompaniya, malls, restaurant ug ubang establisemento gitugotan nga makaabli apan kinahanglan silang mosunod sa mga rekisito para malikayan gihapon ang posibleng pagkatap sa Covid-19.

Wa gihapoy gitugotan nga public transportation nga makapamasahero, apan mahimo nang gamiton ang company shuttles, personal vehicle sa frontliners motorsiklo, biseklita, e-scooter, apan way gitugot nga backrider.

Ang tanang mga kompaniya o business establishment nga moabli kinahanglan nga ipailawom ang tanan nilang empleyado sa rapid test, kansang gasto abagahon sa kompaniya.

Makabukas

Ang mga industriya o sector nga gitugotan nga moabli og 100 percent ang operation mao ang:

• agriculture, forestry, fisheries, manufacturer sa essential goods, hospital, clinics, essential retail, laundry shops, food preparation ug water refilling

• logistics service providers, delivery services, utilities, repair and installation of machinery and equipment

• telcos, energy companies, gasoline stations, construction, manufacturing company ug suppliers para sa construction ug media establishment.

• cement ug steel industry, mining and quarrying, electronic commerce company, postal courier and delivery services, export oriented company, BPO, banks, money transfer, pawnshops ug credit cooperative.

• rental ug leasing gawas sa real estate, employment activities sama sa recruitment ug placement.

Samtang sa 50% workforce nga mga industriya kini gilangkuban sa

• manufacturer sa non-essential goods sama sa beverages (alcoholic drinks), electrical machinery, wood products, furniture, non metallic products, textiles

• wearing apparels, tobacco products, paper and paper products, rubber and plastic products, coke and other refined petroleum products, other non metallic minerals

• computer, electronic and optical products, electrical equipment, motor vehicles, trailers and semi trailers ug other transportation equipment.

Lakip usab sa 50% workforce mao ang

• advertising and market research, computer programming, publishing and printing activities, film, music ug TV production ug ubang susamang kalihukan, wholesale and trade of motor vehicles, motorcycles ug bicycles.

Gidili gihapon ang pag-abli sa mosunod:

• barbershops and salons, gyms or fitness studios ug sports facilities, entertainment industry, kid amusement industry,libraries, archives, museums ug cultural centers, tourist destinations, travel agencies ug personal care agencies.

Gidili gihapon ang pagbiyahe gikan sa laing isla gamit ang eroplano o barko gawas sa otorisado nga government official ug employees, health care workers, law enforcement personnel sama sa pulis, military ug force multipliers, returning OFW ug Filipinos, trucks ug vehicles nga nagdala og cargo ug kadtong sakyanan nga awtorisado sa mayor.

Ang mga border sa Cebu City padayon nga higpit ang pagbantay ug di gihapon makasulod kadtong walay lehitimong mga tuyo sa dakbayan.

GCQ sa lalawigan

Ipaubos na sa general community quarantine ang Probinsya sa Sugbo karong Miyerkules, Mayo 20, 2020, suma sa kasabotan sa tanang mga mayor sa probinsya ug ni Cebu Provincial Governor Gwendolyn Garcia.

Gipresentar ni Garcia ang iyang executive order (EO) 17 ngadto sa mga mayor sa probinsya kabahin sa guidelines nga ipatuman sa panahon nga ipahigayon na ang GCQ. (PAC, KFD)