GI-CREMATE na ang patay nga lawas sa usa ka pasyente nga suspect case sa coronavirus disease (Covid-19) kinsa namatay niadtong Mayo 15, 2020 mga alas 10:30 sa gabii sa Northern Mindanao Medical Center (NMMC).
Ang maong pasyente usa ka 62-anyos nga babaye nga na-admit sa susama nga adlaw mga alas 6:53 sa kaadlawon nga taga Macanhan, Barangay Carmen, syudad sa Cagayan de Oro.
Na-diagnosed kini'g acute decompensated heart failure secondary to coronary artery disease (cad), hypertensive cardiovascular disease (HCVD). Cardiomegaly, Sinus Tachycardia Sepsis secondary to CAP-HR.
Gibutyag ni Dr. Bernard Julius Rocha, medical specialist nga dunay sintomas nga hilanat sulod sa lima ka adlaw ang maong pasyente kinsa kritikal na ang kondisyon pag-abot sa maong ospital.
“We are confirming the admission and the death of a 62-year-old, female from Carmen, Cagayan de Oro. Who actually was admitted because of a five day history of shortness of breathing. Na-admit siya sa amo then on and off iyang fever,” matud ni Rocha.
Nakuhaan na sab kini og swab sample mga alas 9 sa gabii sa wala pa kini nakabsan sa kinabuhi. Samtang gibutyag usab ni Dr. Joselito Retuya, City Epidemiologist sa City Health Office (CHO) nga wala kini kalambigitan sa nagpositibo sa Covid-19 nga taga Barangay Carmen gumikan kay lahi kini nga area.
“Although Covid suspect siya mas daghan siya og comorbidities. Anyway ang atong pasyente o katong namatay gi-swab man siya, we will be waiting for the result of that particular swab..lain nga area,” matud ni Retuya.
Samtang gi-cremate na usab ang patay nga lawas base sa gabayan sa Department of Health (DOH) ug nagpahigayon na usab gyud dayon og contact tracing aron nga mapakgang ang pagkuyanap sa virus kung simbako mag-positibo ang resulta.