DAVAO DE ORO -- Kalabira nang nakit-an ang usa ka lalaki human kini nawala pito na ka tuig ang milabay, didto sa bukirong bahin sa Purok 26, Sitio Quarry, Barangay Ngan, Lungsod sa Compostela.
Giila ang biktima nga si Santiago Masumbid, 45-anyos, minyo, usa ka chainsaw operator kinsa nagpuyo sa maong lungsod.
Subay sa report, kalabira na si Masumbid dihang napalgan kinsa nawala kini sa ilang gipuy-an niadtong Abril 2013 diin sa pagkawala niini, wa suma pa napahibalo ngadto sa otoridad.
Nasayran nga nailhan ang kalabira human positibong giila sa bayaw niini nga si Patrosenio Asio, Jr., 49-anyos, minyo, sakop sa Cafgu Active Auxiliary (CAA) ug molupyo sa Barangay Aliwagwag, Cateel, Davao Oriental.
Giingon sa report nga gumikan sa t-shirt nga gisuot ni Masumbid naila kini sa bayaw gumikan wala nadugta ang t-shirt nga suot niini.
Si Henry Mangaro, 63-anyos, purok leader sa Sitio Puting Bato, sa Compostela ang nakakita sa kalabira diin dako iyang katingala dihang dunay ginasimhot ang iro sa migimaw nga selopin nga nalubong og mabaw.
Dihang gisubay ni Mangaro, gibira ang sud sa selopin, hinungdan nga iya kining gipahibalo sa kapulisan sa Compostela Municipal Police Station.
Gilayong girespondehan sa kapulisan ang maong hitabo, diin sa ulahing adlaw suma sa pamilya, namusil og langgam ang biktima ug wala na gyod kabalik.
Sa kasamtangan nakig-koordinar ang Compostela MPS sa Compostela Municipal Health Office alang sa tukmang disposasyon sa narekober nga kalabira dungan sa pagsusi sa posibleng motibo ug sa pagsubay sa nagpaluyo sa kamatayon sa biktima.