GCQ. Ang mga lungsod ug dakbayan kon component cities sa Probinsya sa Sugbo magsugod ang ilang general community quarantine (GCQ) ugma, Merkoles, kini matud pa ni Gobernador Gwen Garcia homan sa iyang meting sa mga mayor niadtong Bernes didto sa lungsod sa Balamban.
Lakip man unta ang dakbayan sa Sugbo ug Mandaue sa pag-ubos sa Inter-Agency Task Force (IATF) ngadto sa katigoriya nga modified enhanced community quarantine (MECQ) niadtong Bernes, Mayo 15, apan mihangyo sila si Cebu City Mayor Edgar Labella, Mandaue City Mayor Jonas Cortes ug Lapu-Lapu City Mayor Ahong Chan nga magpabilin lang usa sila sa ECQ tungod sa daghan pa nga nataptan sa Covid19.
Ang nahitabo, ang dakbayan sa Lapu-Lapu wa gilakip sa order sa IATF nga magpabilin ubos sa ECQ. Ang dakbayan sa Mandaue ug Cebu ra nga ECQ gihapon. Gani, nagkaguliyang gamay dinhi sa dakbayan sa Sugbo tungod kay nagpagawas na og orden si Mayor Labella niadtong Bernes nga MECQ na ang dakbayan unya nianang gabii miabot ang order sa IATF.
Niadtong Sabado, akong nakita diri sa Talamban nga daghan mga tawo ang nanggawas tungod sa order ni Mayor Labella nga MECQ na ang dakbayan. Gani, nagpainterbyo si Mayor Labella sa radio program ni Bobby Nalzaro aron sa pagpahibawo sa IATF resolution.
Sa akong tan-aw, usa sa mga rason nga giubos ang dakbayan sa Lapu-Lapu sa GCQ, bisan sa hangyo ni Mayor Chan nga magpabilin sa ECQ, tungod kay naa ang erport ug mga industriya sulod sa Mactan Export Processing Zone (Mepza), nga kinahanglan nga moabli na aron makabalik sa trabaho ang mga empleyado.
Naa usab sa dakbayan sa Lapu-Lapu ang daghan nga mga beach resort. Bisan tuod gidili pa ang mga turista gikan sa gawas apan naay daghan nga lokal nga mga parukyano nga gusto na magpahayahay sa baybayon ug dagat. Gihuwat sa resort management lagda gikan sa dakbayan bisan og ila na gisunod ang mga lagda nga gipatuman sa DOH ug IATF.
Sa Mayo 21 ang mga namuyo sa lungsod ug dakbayan sa Probinsya sa Sugbo makatagamtam na sa kalu-ag sa ilang panglihok ubos sa GCQ. Gani, makaduwa na sila og "non-contact sports" sama sa tennis ug golf apan subay gihapon sa naandan nga lagda sa pagsul-ob og mask, social distancing ug pirmi nga panglimpyo sa kamot.
Daghan na ang naghinamhinam nga makaduwa og tennis o di ba golf. Gani, akong mga higala nagsige og text kon kanus-a moabli ang Club Filipino de Cebu golf club, nga naa nahimutang sa dakbayan sa Danao. Matud pa, nangandam na ang opisyales sa Club Filipino alang sa pag-abli unya.
Ang dakong apan kay ang kadaghanan sa moduwa og tennis o golf nia namuyo sa dakbayan sa Sugbo ug Mandaue bisan kon ang tennis o golf clubs naa nahimutang gawas sa dakbayan sa Cebu ug Mandaue. Sa ato pa, sori boys lang gihapon kay di man mo makagawas sa dakbayan. Mohuwat na lang ta sa Hunyo 1. Lain nga duha ka semana kapin nga pag-antos.