ATOL sa pag-downgrade sa Dakbayan sa Lapu-Lapu ug lalawigan sa Sugbo sa General Community Quarantine, ablihan na usab sa Land Transportation Office (LTO)-Central Visayas ang ilahang buhatan sa maong mga dapit.
Sugod karong Miyerkules, Mayo 20, 2020, abli na ang mga district offices, licensing center, ug extension offices sa LTO-Central Visayas sa Sugbo.
Matod ni LTO-Central Visayas Regional Director Victor Emmanuel Caindec nga abli na ang ilahang buhatan sa Lapu-Lapu District Office, Island Mall Mactan Licensing Center, Talisay Extension Office, Carcar District Office, Balamban Licensing Center, Danao District Office, Medellin Extension Office, Camotes Extension Office ug Bantayan Extension Office.
Samtang pabilin una nga sirado ang buhatan nila sa Dakbayan sa Toledo tungod kay padayon pa ang renovation niini.
Hinuon bisan og abli na ang maong mga buhatan sa LTO-Central Visayas, limitado gihapon ang serbisyo nga kasamtangan nga gi-offer niini.
Naglakip ra kini sa renewal sa lisensiya ug renewal sa rehistro sa mga sakyanan.
Hinuon kini temporaryo lang nila nga ablihan hangtod Mayo 31, base na usab sa deklarasyon sa GCQ sa mga dapit.
Base sa registration processing guidelines sa mga buhatan nga anaa na ubos sa GCQ, mamahimo nang i-renew ang mga plaka nga numero tres (3) ang uwahi gikan Mayo 13 hangtod 29.
Samtang kon uwahi nga numero sa plaka kay kuwatro (4), mamahimo kining i-renew sa Hunyo 1 hangtod 19, ug Hunyo 22 hangtod Hulyo 10 ang plaka nga singko (5) ang uwahi nga numero sa plaka niini.
Aduna'y 60 ka adlaw nga gihatag sa mga motorista sa na-expire nila nga rehistro ug lisensya aron pagpa-renew nila.
Unang nibukas ang mga buhatan sa LTO-Central Visayas gawas sa Sugbo human sila unang gideklarar nga GCQ sa Inter-Agency Task Force sa Covid-19 sa nasod.
Gipatuman gihapon ang social distancing, no mask no entry, ug ubang panagang sa Covid-19 atol sa pagbukas sa maong mga buhatan. (HBL)